حافظ آباد،گیس لیکیج سے دھماکا، ایک بچہ جاں بحق، 2 شدید زخمی

جمعہ 24 مئی 2024 18:33

حافظ آباد (اُردو پوائنٹ اخبارتازہ ترین - این این آئی۔ 24 مئی2024ء) حافظ آباد کے ایک گھر میں گیس لیکیج سے دھماکے میں ایک بچہ جاں بحق اور2 بچے جھلس کر شدید زخمی ہو گئے، بچوں کے والدین پنڈی بھٹیاں گئے ہوئے تھے۔حافظ آباد کے علاقے کوٹ سرور کے رہائشی شاہد اور اس کی بیوی پنڈی بھٹیاں گئے ہوئے تھے۔

(جاری ہے)

گھر میں موجود بچوں سے گیس کھلی رہ گئی جو گھر میں بھر جانے پر آگ جلانے سے دھماکا ہو گیا۔

دھماکا اتنا شدید تھا کہ علاقے میں خوف و ہراس پھیل گیا، دھماکے سے گھر کے دروازے ٹوٹ گئے۔متاثرہ بچوں کی عمر 5 سے 8 سال ہے ، ریسکیو ٹیم نے موقع پر پہنچ کر زخمی بچوں کو ٹی ایچ کیو ہسپتال منتقل کیا۔ڈاکٹروں نے ٹی ایچ کیو ہسپتال سے زخمی بچوں کو تشویش ناک حالت کے پیشِ نظر الائیڈ ہسپتال فیصل آباد منتقل کر دیا ہے۔