بابر اعظم نے انگلینڈ کیخلاف دوسرے ٹی ٹونٹی میں شکست کی وجہ بتا دی

لاہور (اردو پوائنٹ تازہ ترین اخبار ۔ 25 مئی 2024ء ) پاکستان کے کپتان بابر اعظم نے ہفتے کو ایجبسٹن سٹیڈیم، برمنگھم میں انگلینڈ کے خلاف دوسرے ٹی ٹوئنٹی میں شکست کی وجہ بتا دی ہے۔ بابر اعظم اینڈ کمپنی 184 کے ہدف کا تعاقب کرتے ہوئے 160 پر ڈھیر ہوگئی۔ پاکستان کے خلاف آخری 11 ٹی ٹوئنٹی میں یہ انگلینڈ کی آٹھویں جیت تھی۔ کھیل کے بعد بابر اعظم نے خامیوں پر غور کیا اور کہا کہ اگر وہ اور فخر زمان زیادہ بیٹنگ کرتے تو نتیجہ مختلف ہوسکتا تھا۔

انہوں نے کہا کہ ابتدائی وکٹیں گرنے کے بعد جس طرح فخر کا غلبہ رہا، مجھے لگتا ہے کہ اگر میں اور فخر چار یا پانچ اوورز مزید بیٹنگ کرتے تو ہم جیت سکتے تھے۔ بابر اعظم نے کہا کہ "ہماری بیٹنگ میں جارحانہ لمحات تھے لیکن ہم اچھی طرح سے میچ ختم کرنے کے قریب نہیں تھے۔

(جاری ہے)

اگر کوئی 40 یا 50 رنز بناتا تو مجھے لگتا ہے کہ ہم یقینی طور پر یہ کھیل جیت چکے ہوتے"۔

واضح رہے کہ دوسرے ٹی 20 میں انگلینڈ نے پاکستان کو 23 رنز سے شکست دے دی۔ برمنگھم میں کھیلے گئے ٹی 20 سیریز کے دوسرے میچ میں انگلینڈ کے 183 رنز کے جواب میں پاکستان کی ٹیم 19.2 اوورز میں 160 رنز پر آؤٹ ہوگئی۔ پاکستان کے اوپنرز ٹیم کو اچھا آغاز فراہم کرنے میں ناکام رہے، محمد رضوان صفر جبکہ صائم ایوب صرف 2 رنز پر پویلین لوٹ گئے۔ فخر زمان نے 45 اور بابراعظم نے 32 رنز بنائے، افتخار 23 ، عماد وسیم 22 اور اعظم خان 11 رنز بناسکے۔

انگلینڈ کی طرف سے ریس ٹوپلی نے 3، معین علی اور جوفر آرچر نے 2، 2 ، کرس جورڈن ، عادل رشید اور لیام لیونگ اسٹون نے ایک، ایک وکٹ حاصل کی۔ قبل ازیں پاکستان نے ٹاس جیت کر انگلینڈ کو بیٹنگ کی دعوت دی تھی، انگلینڈ نے پہلے بیٹنگ کرتے ہوئے مقررہ 20 اوورز میں سات وکٹوں کے نقصان پر 183 رنز بنائے۔ انگلش کپتان جوز بٹلر نے 84 رنز کی شاندار اننگز کھیلی، ول جیکس 37، جونی بیرسٹو 21 اور فل سالٹ 13 رنز کے ساتھ نمایاں رہے۔ پاکستان کی طرف سے شاہین آفریدی نے 3، عماد وسیم اور حارث رؤف نے 2، 2 وکٹیں حاصل کیں۔