کرکٹرز کے روپ میں ملائیشیا جانے کی کوشش کرنے والے 15 بنگلہ دیشی گرفتار

جمعرات 20 مارچ 2025 16:39

کوالا لمپور(اُردو پوائنٹ اخبارتازہ ترین - این این آئی۔ 20 مارچ2025ء)کرکٹرز کے روپ میں ملائیشیا جانے کی کوشش کرنے والے 15 بنگلہ دیشی باشندے گرفتار کر لیے گئے۔میڈیارپورٹس کے مطابق کوالا لمپور انٹرنیشنل ایئرپورٹ پر 15 بنگلہ دیشی باشندے گرفتار کر لیے گئے جو اپنے آپ کو کرکٹ ٹیم کا رکن ظاہر کر رہے تھے۔دی ملائیشین بارڈر کنٹرول اینڈ پروٹیکشن ایجنسی (اے کے پی ایس)کے مطابق گرفتار ہونے والا گروہ ایجنسی آفیسرز کو دھوکہ دے کر ملائیشیا میں داخل ہونے کی کوشش کر رہا تھا۔

اس گروہ نے کرکٹ کی کِٹ پہنی ہوئی تھی اور کرکٹ ٹورنامنٹ کا لیٹر بھی ان کے پاس تھا۔ مبینہ طور پر یہ لیٹر پینانگ کرکٹ ایوسی ایشن کی جانب سے جاری کیا گیا تھا جو کہ جعلی ثابت ہوا۔حکام کا کہنا تھا کہ 21 مارچ سے 23 مارچ تک کوئی بھی کرکٹ ٹورنامنٹ شیڈول نہیں ہے۔

(جاری ہے)

اے کے پی ایس نے مزید بتایا کہ اس گروہ کے بارے میں شبہات اس وقت بڑھ گئے جب انہوں نے سپانسر کو ضامن بنانے کی کوشش کی۔

جس سپانسر کو ضامن بنانے کی کوشش کی گئی اس کے علم میں کسی بھی کرکٹ ٹورنامنٹ کے انعقاد کی کوئی خبر نہیں تھی۔حکام کا کہنا تھا کہ مزید تفتیش سے پتا چلا کہ گروہ کے بارے میں کوئی ٹھوس ثبوت نہیں ملے کہ وہ کرکٹرز ہیں۔اس گروپ کو ناٹ ٹو لینڈ (این ٹی ایل) کی فہرست میں ڈالا گیا ہے اور اِن کے خلاف امیگریشن قوانین کے تحت مزید کارروائی کی جائے گی۔