انسٹاگرام کا اے آئی سے بنے اکانٹس کے خلاف کارروائی کا اعلان

بدھ 2 ستمبر 2026 11:34

نیویارک (اُردو پوائنٹ اخبارتازہ ترین - این این آئی۔ 02 ستمبر2026ء) انسٹاگرام نے ایسے اکائونٹس کے خلاف کارروائی سخت کرنے کا اعلان کیا ہے جو بظاہر حقیقی افراد کے پروفائلز دکھائی دیتے ہیں لیکن دراصل مصنوعی ذہانت (اے آئی)کے ذریعے تخلیق کیے گئے فرضی کرداروں پر مبنی ہوتے ہیں۔سوشل میڈیا صارفین کی جانب سے اس حوالے سے بڑھتی ہوئی شکایات سامنے آ رہی تھیں کہ وہ کسی پروفائل کو حقیقی انسان سمجھتے ہیں لیکن بعد میں معلوم ہوتا ہے کہ اس شخص کا حقیقت میں کوئی وجود ہی نہیں اور اس کی تصویر یا شناخت اے آئی سے بنائی گئی ہے۔

انسٹاگرام ایسے اکائونٹس کو مکمل طور پر بند نہیں کرے گا۔ البتہ، ان کی شناخت واضح کرنے کے لیے لیبل میں تبدیلی کی جائے گی۔ موجودہ اے آئی کریئٹر لیبل کو تبدیل کرکے اے آئی جنریٹڈ پروفائل کر دیا جائے گا۔

(جاری ہے)

انسٹاگرام کے مطابق ایسے اکائونٹس جو فرضی اے آئی شخصیات پر مشتمل ہوں اور ان پر مناسب لیبل موجود نہ ہو، ان کی رسائی بھی محدود کی جائے گی، جس کے نتیجے میں ان کی پوسٹس کم صارفین تک پہنچ سکیں گی۔

کمپنی کا کہنا ہے کہ یہ تبدیلی صارفین کی جانب سے ملنے والے فیڈ بیک کے بعد کی گئی ہے۔ انسٹاگرام نے رواں سال کے آغاز میں اے آئی کریئٹر لیبل کی آزمائش شروع کی تھی، جس کا مقصد پلیٹ فارم پر اے آئی سے بنائے گئے فرضی کرداروں اور پروفائلز کے بڑھتے ہوئے رجحان سے نمٹنا تھا۔نئی پالیسی کے ذریعے انسٹاگرام صارفین کو یہ سمجھنے میں مدد دینا چاہتا ہے کہ ان کے سامنے موجود پروفائل کسی حقیقی شخص کا ہے یا مصنوعی ذہانت سے تیار کردہ ایک فرضی شناخت ہے۔