پوٹاش کا استعمال گندم کے دانے کا وزن بڑھانے، فصل کو بیماریوں سے محفوظ رکھنے میں انتہائی معاون ہوتا ہے،محكمہ زراعت

جمعہ 21 نومبر 2025 13:40

سیالكوٹ (اُردو پوائنٹ اخبارتازہ ترین - اے پی پی۔ 21 نومبر2025ء) پوٹاش کا استعمال گندم کے دانے کا وزن بڑھانے، فصل کو بیماریوں سے محفوظ رکھنے اور گرنے سے بچانے میں انتہائی معاون ہوتا ہے اور جدید طریقہ کاشت سے 60 من فی ایکڑ تک گندم کی پیداوار حاصل کی جا سکتی ہے۔ان خیالات کا اظہار اسسٹنٹ ڈائریکٹر محکمہ زراعت سمبڑیال ڈاکٹر افتخار حسین بھٹی نے آج جمعہ کو گندم کے کاشتکاروں کے نام اپنے پیغام میں کیا۔

انہوںنے کہا کہکاشتکار پوٹاش کے استعمال سمیت جدید ٹیکنالوجی کا استعمال یقینی بنائیں تاکہ بمپر کراپ کاحصول ممکن ہو سکے۔ انہوں نے بتایاکہ اگر سفارش کردہ مقدار کے مطابق بیج کی بوائی اور جڑی بوٹیوں پر بروقت قابو پانے سمیت بیج کو دوائی لگا کر کاشت کیاجائے تو فی ایکڑ بہتر پیداوار حاصل ہو سکتی ہے۔

(جاری ہے)

انہوں نے بتایاکہ تحفظ نباتات کے اصولوں کے مطابق نوکیلے اور چوڑے پتوں والی جڑی بوٹیوں بشمول باتھو، لہلی، لہیہ وغیرہ کو کنٹرول کرنے کیلئے پہلے پانی کے بعد وتر حالت میں سپرے کرنا چاہیے جبکہ نوکیلے و چھوٹے پتے والی جڑی بوٹیوں بشمول دنبی سٹی، جنگلی جئی کو کنٹرول کرنے کیلئے دوسرے پانی کے ساتھ سپرے اشد ضروری ہے۔

اسسٹنٹ ڈائریکٹرنے کہاکہ کاشتکاروں کو پیداوار بڑھانے کیلئے اس عز م کا اعادہ کرناچاہیے کہ وہ جدید ٹیکنالوجی کے استفادہ سمیت ماہرین زراعت کی سفارشات پر مکمل عملدرآمد یقینی بنائیں گے۔ انہوں نے کہاکہ اس ضمن میں مزید مشاورت اور رہنمائی کیلئے زرعی ماہرین یا محکمہ زراعت کے فیلڈ سٹاف سے بھی رابطہ کیاجاسکتاہے۔