باغبانوں کوپھل نہ دینے والے کھجور کے پودوں کو آدھی کیمیائی کھاد31دسمبر تک گوبر والی کھاد کے ساتھ مکس کر کے ڈالنے کی ہدایت

منگل 9 دسمبر 2025 20:27

فیصل آباد (اُردو پوائنٹ اخبارتازہ ترین - اے پی پی۔ 09 دسمبر2025ء) ڈیٹ پام ریسرچ انسٹی ٹیوٹ ایوب زرعی تحقیقاتی ادارہ فیصل آباد کے ماہرین اثمار نے کھجور کے کاشتکاروں وباغبانوں کو رواں ہفتہ کے دوران پودوں میں گوبر کی گلی سڑی کھاد ڈالنے کی ہدایت کی ہے۔ ماہرین نے کہاہے کہ باغبان و کاشتکار دسمبر کے رواں ہفتہ میں کھاد ڈالنے کا عمل مکمل کر لیں جبکہ انہوں نے دسمبر کے آخر اور جنور ی کے پہلے عشرہ کے دوران کھجور کے پودوں کو فاسفورس کھاد کی پوری اور نائٹروجن کی آدھی مقدار ڈالنے کی بھی ہدایت کی ہے ۔

انہوں نے بتایاکہ کاشتکاروں کو 4سے5کلوگرام ایس ایس پی یا 2کلوگرام ٹی ایس پی اور ایک کلوگرام یوریا کھاد فی پودا استعمال کروانی چاہیے۔ انہوں نے کہاکہ پھل نہ دینے والے کھجور کے پودوں کیلئے بھی ضروری ہے کہ انہیں آدھی کیمیائی کھاد 31دسمبر تک گوبر والی کھادکے ساتھ اور بقیہ کھاد جنوری کے آخری ہفتہ میں ڈالیں۔

(جاری ہے)

انہوں نے کہاکہ کھاد تنے سے ایک فٹ دور درخت کی شاخوں کے پھیلاؤ کے برابر زمین میں ڈال کر اچھی طرح گوڈی کرنے سے اس کے بہترین نتائج حاصل ہو سکتے ہیں۔

انہوں نے کہاکہ کاشتکار گوڈی کے بعد پانی لگا ئیں۔ انہوں نے 31دسمبر سے قبل درختوں کی شاخ تراشی، پرانے پتوں کو توڑنے، جن شاخوں پر پھل لگ چکا ہو انہیں کاٹنے اور نئے پتوں سے کانٹے ختم کرنے کی بھی ہدایت کی تاکہ یہ کانٹے پھل کو زخمی نہ کر سکیں۔ اس ضمن میں مزید رہنمائی اور مشاورت کےلئے ماہرین زراعت یا محکمہ زراعت کے فیلڈ سٹاف سے بھی رابطہ کیا جا سکتاہے۔