کاشتکار سبزیوں کو رات کے وقت کورے سے بچانے کے لئے پلاسٹک شیٹ سے ڈھانپ دیں،محكمہ زراعت سمبڑیال

جمعہ 26 دسمبر 2025 14:30

سیالکوٹ (اُردو پوائنٹ اخبارتازہ ترین - اے پی پی۔ 26 دسمبر2025ء) اسسٹنٹ ڈائریکٹر محکمہ زراعت سمبڑیال ڈاکٹر افتخار حسین بھٹی نے کہا ہے کہ کاشتکار شدید سردی اور کورا پڑنے کے دنوں میں سبزیوں کے کھیتوں میں کم مقدار میں پانی لگائیں اور سبزیوں سمیت نرسریوں کو رات کے وقت پلاسٹک شیٹ سے ڈھانپ دیں۔

(جاری ہے)

انہوں نے کہا کہ دسمبر اور جنور ی میں شدید سردی اور کورے کے باعث سبزیوں کے پودوں کے تنوں، شاخوں اور نرم ونازک پتوں کے خلیوں میں موجود پانی جم جاتا ہے جس کی وجہ سے پودوں کی نشونما متاثر ہوتی ہے اور نازک پودوں کے مر جانے کا خدشہ ہوتا ہے۔

سبزیوں کی فصلوں کو کورے اور سردی سے محفوظ رکھنے کے لئے کاشتکار کھیتوں کے ارد گرد بھوسے، پرالی، خشک گھاس کی باڑ بنائیں۔انہوں نے کہاکہ کاشتکار مزید رہنمائی کے لئے ماہرین زراعت کی خدمات سے استفادہ یا ہیلپ لائن سے بھی رہنمائی حاصل کرسکتے ہیں۔