واٹس ایپ استعمال کرنے والوں کیلئے نیا فیچر متعارف

صارفین اب کوئی گروپ جوائن کرنے سے پہلے کے میسجز بھی دیکھ سکیں گے، یہ پیغامات چیٹ سکرین پر ایک مختلف رنگ میں ظاہر ہوں گے

ساجد علی ہفتہ 21 فروری 2026 12:42

واٹس ایپ استعمال کرنے والوں کیلئے نیا فیچر متعارف

نیویارک (اُردو پوائنٹ اخبارتازہ ترین۔ 21 فروری2026ء) دنیا کی معروف کمپنی میٹا کی زیر ملکیت مقبول ترین میسجنگ ایپلیکیشن واٹس ایپ نے صارفین کیلئے نیا فیچر متعارف کرادیا۔ تفصیلات کے مطابق اس نئے فیچر کو ’گروپ چیٹ ہسٹری شیئرنگ‘ کا نام دیا گیا ہے، اس سہولت کے ذریعے صارفین اب کوئی گروپ جوائن کرنے سے پہلے کے میسجز بھی دیکھ سکیں گے، گروپ کے پرانے اور متحرک اراکین اب حالیہ پیغامات اور میڈیا فائلز نئے افراد کے ساتھ شیئر کر سکیں گے تاکہ وہ جاری گفتگو کا پس منظر سمجھ سکیں اور بغیر کسی رکاوٹ کے بات چیت میں شامل ہو جائیں۔

بتایا گیا ہے کہ یہ فیچر اینڈرائیڈ اور آئی او ایس دونوں صارفین کے لیے مرحلہ وار متعارف کرایا جا رہا ہے اور آئندہ چند ہفتوں میں بتدریج تمام صارفین تک پہنچ جائے گا، اس نئی سہولت کے بعد گروپ ایڈمنز کو نئے شامل ہونے والوں کو بار بار پرانے پیغامات فارورڈ کرنے کی زحمت نہیں اٹھانا پڑے گی کیوں کہ یہ عمل اب خودکار انداز میں انجام دیا جا سکے گا، اب اگر کوئی فرد کسی گروپ کا حصہ بنتا ہے تو پرانے اراکین اس کے ساتھ گزشتہ 14 دنوں کے دوران ہونے والی گفتگو میں سے 25 سے 100 پیغامات تک شیئر کرسکیں گے۔

(جاری ہے)

معلوم ہوا ہے کہ یہ آپشن مکمل طور پر صارفین کی صوابدید پر ہوگا، یعنی اگر گروپ کے منتظم یا ممبرز چاہیں تو ہی چیٹ ہسٹری شیئر کی جا سکے گی، اس طرح پرائیویسی کے تقاضوں کو بھی مدنظر رکھا گیا ہے اور صارفین کو مکمل کنٹرول فراہم کیا گیا ہے، نئے ممبرز کے ساتھ شیئر کیے جانے والے یہ پیغامات چیٹ سکرین پر ایک مختلف رنگ میں ظاہر ہوں گے تاکہ انہیں بآسانی پہچانا جا سکے اور یہ واضح رہے کہ یہ پیغامات پرانی گفتگو کا حصہ ہیں، جب بھی چیٹ ہسٹری شیئر کی جائے گی تو گروپ کے تمام اراکین کو نوٹیفکیشن کے ذریعے آگاہ کیا جائے گا اور بتایا جائے گا کہ کس رکن نے یہ پیغامات نئے ممبر کے ساتھ شیئر کیے ہیں۔