بارانی علاقوں میں مونگ پھلی کی کاشت اپریل کے آخر تک کی جاسکتی ہے، محکمہ زراعت

جمعرات 12 مارچ 2026 16:47

فیصل آباد (اُردو پوائنٹ اخبارتازہ ترین - اے پی پی۔ 12 مارچ2026ء) بارانی علاقوں میں مونگ پھلی کی کاشت دبائے ہوئے وترمیں وسط مارچ سے اگلے ماہ اپریل کے آخر تک کی جاسکتی ہے۔ڈپٹی ڈائریکٹر زراعت توسیع عدیل نے اے پی پی کو بتایا کہ ایسے علاقہ جات جہاں کسی وجہ سے گندم کی کاشت نہ کی جاسکی ہو وہاں حالیہ حاصل کردہ وتر کے صحیح استعمال کو یقینی بنانے کیلئے مونگ پھلی کی کاشت شروع کردی جائے۔

انہوں نے کہاکہ کاشتکار مونگ پھلی کی کاشت کیلئے زمین کو اچھی طرح تیار کرلیں اور بہتر پیداوار کیلئے پانی کے اچھے نکاس والی قدرے ریتلی میرازمین کا انتخاب کیاجائے۔ انہوں نے کہاکہ کاشتکار زمین کی تیاری کے وقت گہرا ہل چلائیں تاکہ اوپر والی مٹی مکمل طور پر نیچے چلی جائے اور جڑی بوٹیاں بھی تلف ہو جائیں۔

(جاری ہے)

انہوں نے بتایاکہ پیداوار کے اعلیٰ معیار کو برقرار رکھنے کیلئے معیاری بیج کااستعمال انتہائی اہمیت کاحامل ہے تاہم اگر بیج پرانا ہو، پھلیوں سے دانے زیادہ دیر پہلے نکلے ہوئے ہوں یا گریوں کے اوپر والا گلابی رنگ کاباریک چھلکا صحیح سالم نہ ہو اور بیج ٹوٹاہواہو تو اس کے اگنے کی صلاحیت ختم ہو جاتی ہے۔

انہوں نے بتایاکہ شرح بیج 50کلوگرام پھلیاں یا 30کلوگرام گریاں فی ایکڑ رکھنا ضروری ہے تاکہ پودوں کی فی ایکڑ مطلوبہ تعداد 60 سے 65 ہزار حاصل کرنے میں مدد مل سکے۔انہوں نے کہاکہ باری 2000اور گولڈن اقسام انتہائی شاندار فصل کی حامل ہیں جو نہ صرف کیڑے مکوڑوں کے حملوں کے خلاف بھرپور قوت مدافعت رکھتی ہیں بلکہ خشک سالی اور دیگر بیماریوں سمیت موسمی حالات کا بھی مؤثر طریقے سے مقابلہ کرتی ہیں۔ انہوں نے کہاکہ کاشتکار مزید رہنمائی کیلئے ماہرین زراعت یا محکمہ زراعت کے فیلڈ سٹاف کی خدمات سے بھی استفادہ کرسکتے ہیں۔

Facebook Twitter Google + Share on Whatsapp

بارانی علاقوں میں مونگ پھلی کی کاشت اپریل کے آخر تک کی جاسکتی ہے، محکمہ زراعت

متعلقہ عنوان :

مزید زراعت کی خبریں