لاہور ٹیکس بار کے وفد کی چیف کمشنر ایل ٹی او سے ملاقات ، مسائل سے آگاہ کیا

مسائل کے فوری حل کیلئے کمشنرایل ٹی او،لاہور ٹیکس بار کیجنرل سیکرٹری فوکل پرسن مقرر

اتوار 19 اپریل 2026 13:20

لاہور(اُردو پوائنٹ اخبارتازہ ترین - این این آئی۔ 19 اپریل2026ء) لاہور ٹیکس بار ایسوسی ایشن کے صدر رانا ثاقب منیر کی قیادت میں وفد نے ایف بی آر کے چیف کمشنر ایل ٹی او لاہور یاسر علی سے ملاقات کر کے انکم ٹیکس اور سیلز ٹیکس ریفنڈز کی عدم ادائیگی، ایگزمپشن سرٹیفکیٹس کے اجرا ء میں تاخیر اور زیر التوا ء کیسز کے حل میں سست روی پر اپنی تشویش سے آگاہ کیا ۔

وفد میں جنرل سیکرٹری فاروق گجر ،نائب صدر میاں عثمان جاوید،جوائنٹ سیکرٹری علی رضا چیمہ،فنانس سیکرٹری سعد ایوب خان اور دیگر شامل تھے۔اس موقع پر لاہور ٹیکس بار کے سابق صدور اور سینئر اراکین میں چوہدری قمرالزمان، محمد آصف رانا، زاہد عتیق چوہدری، شہباز صدیق، منشا سکھیرا، شیخ یاسین، طاہر محمود بٹ، احسن ورک، ارشد بشیر، نعمان رزاق اور منیب ناصر رندھاوااور ایف بی آر سے نعیم عباس بھی موجود تھے۔

(جاری ہے)

لاہور ٹیکس بار کے صدر رانا ثاقب منیر ،جنرل سیکرٹری فاروق گجر اوردیگر عہدیداران نے موقف اختیار کیا کہ ٹیکس پریکٹیشنرز ایف بی آر کی ہدایات کے مطابق ٹیکس دہندگان سے ایڈوانس ٹیکس جمع کرواتے ہیں تاہم اس کے باوجود انکم ٹیکس اور سیلز ٹیکس ریفنڈز کے اجرا ء میں غیر ضروری تاخیر کی جا رہی ہے جبکہ ایگزمپشن سرٹیفکیٹس کے اجرا ء میں بھی رکاوٹیں سامنے آ رہی ہیں جس سے ٹیکس دہندگان کا اعتماد متاثر ہو رہا ہے۔

لاہور ٹیکس بار کے عہدیداروںنے مزید کہا کہ ٹیکس ایئر 2020 کے ٹائم لیمیٹیشن سے متعلق زیر التوا ء کیسز میں ٹیکس پریکٹیشنرز کو مکمل سماعت کا موقع دیا جائے اور ان کیسز کو جون 2026 سے قبل نمٹایا جائے، اس کے ساتھ ساتھ نان پرافٹ آرگنائزیشنز کی درخواستوں کو بھی فوری طور پر زیر غور لایا جائے۔چیف کمشنر یاسر علی نے وفد کو یقین دہانی کرائی کہ ٹیکس سے متعلق مسائل کے حل کے لیے خصوصی اقدامات کیے جائیں گے۔

ملاقات میںلاہور ٹیکس بار کے مسائل کے فوری حل کے لیے کمشنرایل ٹی اواور لاہور ٹیکس بار کی جانب سے جنرل سیکرٹری لاہور ٹیکس بار فاروق گجر کو فوکل پرسن مقرر کیا گیا ۔انہوں نے مزید کہا کہ لاہور ٹیکس بار ایک اہم اور موثر ادارہ ہے جس نے ہمیشہ ٹیکس اہداف کے حصول میں کلیدی کردار ادا کیا ہے، اس کے مسائل کے حل کو ترجیح دی جائے گی۔