لودھراں پائلٹ پراجیکٹ کی جانب سے فری آئی کیمپ ،300سے زائد مریضوں کے آپریشن

ہمیشہ وسائل مستحق لوگوں تک پہنچانے کی کوشش کی ہے ‘ جہانگیر ترین کی آئی کیمپ کے دورہ کے موقع پر گفتگو

بدھ 29 اپریل 2026 20:20

لاہور(اُردو پوائنٹ اخبارتازہ ترین - این این آئی۔ 29 اپریل2026ء) جہانگیر خان ترین کے خصوصی تعاون سے لودھراں پائلٹ پراجیکٹ کی جانب سے 12ایم پی آر گیلے وال میں فری آئی کیمپ کا انعقاد کیا گیا۔ دو روزہ فری آئی کیمپ میں 732مریضوں کا چیک اپ اور ادویات فراہم کی گئیں جبکہ 300سے زائد مریضوں کے آپریشن بھی کیے گئے جس سے کئی افراد کی بینائی بحال ہوئی ۔ جہانگیر خان ترین نے کیمپ کا دورہ کر کے زیرِ علاج مریضوں سے ملاقات کی۔

انہوں نے مریضوں سے گفتگو کرتے ہوئے کہا کہ آنکھوں میں واپس آتی روشنی دیکھ کر دل کو جو سکون ملتا ہے وہ الفاظ میں بیان نہیں کیا جا سکتا۔ میری ہمیشہ سے یہی کوشش رہی ہے کہ ہم اپنے وسائل کو ان لوگوں تک پہنچائیں جو واقعی اس کے مستحق ہیں۔ اگر ہم کسی ایک انسان کی زندگی میں آسانی پیدا کر سکتے ہیں تو یہی ہماری سب سے بڑی کامیابی ہے۔

(جاری ہے)

انہوں نے مزید کہا کہ صحت کی سہولیات ہر انسان کا بنیادی حق ہے اور اس حق کو یقینی بنانے کے لیے ایسے فری کیمپس کا دائرہ کار بڑھایا جائے گا۔

مریضوں اور ان کے اہل خانہ نے اس اقدام کو سراہتے ہوئے جہانگیر خان ترین کا شکریہ ادا کیا اور اسے ایک امید کی کرن قرار دیا۔ایل پی پی کے چیف ایگزیکٹو آفیسر ڈاکٹر عبدالصبور نے جہانگیر خان ترین کو بریفنگ میںبتایا کہ اب تک منعقدہ 46 فری آئی کیمپس میں 75ہزار مریضوں کا مفت چیک اپ، ادویات و چشمے فراہم کیے جا چکے ہیں جبکہ ان کیمپس میں ساڑھے 10ہزار مریضوں کے کامیاب آپریشن بھی کیے جا چکے ہیں۔