ایف آئی اے فیصل آباد زون نے 2 اشتہاری انسانی اسمگلر گرفتار کرلیے

منگل 2 جون 2026 18:42

جڑانوالہ (اُردو پوائنٹ اخبارتازہ ترین - آن لائن۔ 02 جون2026ء) ایف آئی اے فیصل آباد زون نے 2 اشتہاری انسانی اسمگلر گرفتار کرلیے، ملزمان نے سادہ لوح شہریوں کو بیرون ملک بھجوانے کا جھانسہ دیکر لاکھوں روپے بٹورے، ملزمان کیخلاف قانونی کارروائی شروع کردی گئی ہے۔ متعلقہ حکام نے بتایا کہ وفاقی تحقیقاتی اداری(ایف آئی ای) فیصل آباد زون نے انسانی اسمگلنگ اور غیر قانونی امیگریشن میں ملوث عناصر کے خلاف کارروائیاں کرکے 2 اشتہاری انسانی اسمگلر گرفتار کرلیے۔

ایف آئی اے کمپوزٹ سرکل فیصل آباد نے کامیاب کارروائی کرتے ہوئے اشتہاری ملزم ساجد علی ولد محمد شفیع سکنہ سیٹلائٹ ٹاؤن ضلع جھنگ کو گرفتار کر لیا۔ ملزم مقدمہ نمبر 675/2024 زیر دفعات 17/22 امیگریشن آرڈیننس 1979 میں مطلوب تھا۔

(جاری ہے)

مقدمہ کے مطابق ملزمان نے مدعی سے دبئی میں روزگار دلوانے کے بہانے 4 لاکھ 15 ہزار روپے وصول کیے، تاہم وعدے کے مطابق بیرون ملک بھجوانے میں ناکام رہے۔

اسی طرح ایک اور کارروائی میں ایف آئی اے کمپوزٹ سرکل فیصل آباد نے اشتہاری ملزم محمد زبیر مقبول ولد مقبول سکنہ نورپور، تحصیل و ضلع فیصل آباد کو گرفتار کر لیا۔ ملزم مقدمہ نمبر 357/2025 زیر دفعات 17/22 امیگریشن آرڈیننس 1979 میں مطلوب تھا۔ مقدمہ کے مطابق ملزمان نے مدعی، اس کے بھائی اور کزنز کو البانیہ بھجوانے کے نام پر 21 لاکھ 22 ہزار روپے وصول کیے، مگر اپنے وعدے پورے نہ کیے۔ حکام نے بتایا کہ ملزمان کیخلاف قانونی کارروائی شروع کردی گئی ہے۔گرفتار ملزمان سے مزید تفتیش جاری ہے اور مقدمات کے دیگر پہلوؤں کا بھی جائزہ لیا جا رہا ہے۔