سندھ پیڈل اوپن چیمپئن شپ 2026 اختتام پذیر، نمیر شمسی، عذیر احمد اور نتالیہ زمان نمایاں، 10 لاکھ روپے کی انعامی رقم تقسیم کیے

پیر 15 جون 2026 22:25

کراچی (اُردو پوائنٹ اخبارتازہ ترین - این این آئی۔ 15 جون2026ء) سندھ حکومت کے زیر اہتمام لیجنڈز ایرینا میں منعقدہ تین روزہ سندھ پیڈل اوپن چیمپئن شپ 2026اختتام پذیر ہوگئی، جس میں بوائز اور ویمنز کیٹیگریز کے دلچسپ مقابلوں کے بعد کامیاب کھلاڑیوں میں مجموعی طور پر 10 لاکھ روپے کی انعامی رقم تقسیم کی گئی۔اختتامی تقریب میں سیکریٹری کھیل سندھ منور علی مہیسر، پارلیمانی سیکریٹری کھیل صائمہ آغا، ڈائریکٹر کھیل اسد اسحاق، ڈپٹی ڈائریکٹر سید حبیب اللہ، ڈی ایس اوز فرید علی، سید اسماعیل شاہ، ایس او علی ڈنو گوپانگ، سمیت دیگر افسران، کھلاڑیوں اور شائقین کی بڑی تعداد نے شرکت کی۔

تقریب کے دوران سیکریٹری کھیل سندھ منور علی مہیسر نے کامیاب کھلاڑیوں اور ٹیموں میں ٹرافیاں، میڈلز اور کیش انعامات تقسیم کیے۔

(جاری ہے)

بوائز اوپن کیٹیگری میں نمیر شمسی اور عذیر احمد نے شاندار کھیل کا مظاہرہ کرتے ہوئے ٹائٹل اپنے نام کیا، جبکہ ریان یونس اور عبداللہ شیراز رنر اپ رہے۔ویمنز کیٹیگری میں نتالیہ زمان اور سائرہ عمر نے پہلی پوزیشن حاصل کی، جبکہ مصفرا زاہد اور صائمہ طلحہ رنر اپ قرار پائیں۔

سیکریٹری کھیل سندھ منور علی مہیسر نے بتایا کہ چیمپئن شپ کے لیے مجموعی طور پر 10 لاکھ روپے کی انعامی رقم مختص کی گئی تھی، جو مختلف کیٹیگریز میں نمایاں کارکردگی دکھانے والے کھلاڑیوں اور ٹیموں میں تقسیم کی گئی۔ انہوں نے کہا کہ اوپن کیٹیگری میں ونر ٹیم کو 3 لاکھ روپے جبکہ رنر اپ ٹیم کو 2 لاکھ روپے کا کیش انعام دیا گیا۔منور علی مہیسر کے مطابق چیمپئن شپ میں بوائز کی 32 اور ویمنز کی 16 ٹیموں نے شرکت کی، جبکہ تین روزتک جاری رہنے والے مقابلوں میں کھلاڑیوں نے اعلی صلاحیتوں کا مظاہرہ کیا اور شائقین کو سنسنی خیز مقابلے دیکھنے کو ملے۔

انہوں نے کہا کہ ایونٹ کے انعقاد کا مقصد سندھ میں پیڈل کھیل کے فروغ، نوجوان کھلاڑیوں کو اپنی صلاحیتوں کے اظہار کے مواقع فراہم کرنے اور کھیلوں کی مثبت سرگرمیوں کو فروغ دینا ہے۔اختتامی تقریب میں شرکا نے کامیاب ایونٹ کے انعقاد پر محکمہ کھیل سندھ کی کاوشوں کو سراہتے ہوئے امید ظاہر کی کہ آئندہ بھی ایسے مقابلوں کا انعقاد جاری رکھا جائے گا۔