مصر کے ڈاکٹر محمد عبدالرحیم البیومی کا منہاج القرآن سیکرٹریٹ اور منہاج یونیورسٹی لاہور کا دورہ

لاہور (اُردو پوائنٹ اخبارتازہ ترین - آن لائن۔ 08 جولائی2026ء) مصر کی سپریم کونسل برائے مذہبی امور کے رکن فضیلة الشیخ ڈاکٹر محمد عبدالرحیم البیومی نے اعلیٰ سطحی وفد کے ہمراہ مرکز منہاج القرآن انٹرنیشنل اور منہاج یونیورسٹی لاہور کا دورہ کیا۔ وفد میں خطیب مرکزی جامع مسجد ابوجا (نائیجیریا) فضیلة الاستاذ ڈاکٹر ابراہیم احمد مقری، چیئرمین مسلم ہینڈز انٹرنیشنل (یوکی) پیر سید لختِ حسنین، ڈاکٹر محمد نعیم الازہری، پیر ضیاء النور شاہ، ریحان طارق، احسان الحق صدیقی اور خالد قریشی شامل تھے۔

مرکزی سیکرٹریٹ آمد پر ناظمِ اعلیٰ منہاج القرآن انٹرنیشنل خرم نواز گنڈاپور نے مرکزی رہنمائوں، کالج آف شریعہ اینڈ اسلامک سائنسز کے فیکلٹی ممبران اور طلبہ کے ہمراہ معزز مہمانوں کا پرتپاک استقبال کیا۔

(جاری ہے)

انہوں نے وفد کو مرکزی سیکرٹریٹ، فریدِ ملت ریسرچ انسٹیٹیوٹ، گوشہٴ درود اور دیگر شعبہ جات کا تفصیلی دورہ کروایا، جہاں تحریک منہاج القرآن کی علمی، تحقیقی، دعوتی، فلاحی اور تنظیمی سرگرمیوں پر جامع بریفنگ دی گئی۔

اس موقع پر وفد کو شیخ الاسلام ڈاکٹر محمد طاہرالقادری کی علمی و تحقیقی تصانیف بطورِ تحفہ پیش کی گئیں۔فریدِ ملت ریسرچ انسٹیٹیوٹ کے دورے کے موقع پر فضیلة الشیخ ڈاکٹر محمد عبدالرحیم البیومی نے شیخ الاسلام ڈاکٹر محمد طاہرالقادری، چیئرمین سپریم کونسل منہاج القرآن انٹرنیشنل پروفیسر ڈاکٹر حسن محی الدین قادری اورصدر منہاج القرآن و ڈپٹی چیئرمین بورڈ آف گورنرز منہاج یونیورسٹی لاہور پروفیسر ڈاکٹر حسین محی الدین قادری کی منتخب علمی تصانیف کے عربی زبان میں تراجم کی ضرورت پر زور دیتے ہوئے کہا کہ ان علمی ذخائر کو جامعتہ الازہر کے نصاب میں شامل کیا جانا چاہیے تاکہ دنیا کے ممتاز دینی تعلیمی ادارے کے طلبہ و طالبات ان سے بھرپور استفادہ کر سکیں۔

اس موقع پر خطیب مرکزی جامع مسجد ابوجا، نائیجیریا فضیلة الاستاذ پروفیسر ڈاکٹر ابراہیم احمد مقری نے کہا کہ منہاج القرآن انٹرنیشنل کی علمی، فکری اور اصلاحی خدمات قابلِ تقلید ہیں۔ انہوں نے خواہش ظاہر کی کہ نائیجیریا میں بھی منہاج القرآن انٹرنیشنل کے تعلیمی و تربیتی ادارے قائم کیے جائیں تاکہ وہاں کے عوام اس عظیم علمی و اصلاحی مشن سے مستفید ہو سکیں۔

چیئرمین مسلم ہینڈز انٹرنیشنل (یوکی) پیر سید لختِ حسنین نے کہا کہ دارالعلوم محمدیہ غوثیہ بھیرہ شریف اور تحریک منہاج القرآن کے درمیان ابتدا ہی سے علمی، روحانی اور برادرانہ تعلقات قائم ہیں، جو وقت کے ساتھ مزید مضبوط ہوئے ہیں۔بعد ازاں وفد نے منہاج یونیورسٹی لاہور کا دورہ کیا جہاں وائس چانسلر پروفیسر ڈاکٹر ساجد محمود شہزاد نے یونیورسٹی انتظامیہ کے ہمراہ معزز مہمانوں کا استقبال کیا۔

انہوں نے وفد کو یونیورسٹی کی تعلیمی، تحقیقی، اختراعی اور بین الاقوامی سرگرمیوں پر جامع بریفنگ دی۔ وفد نے تصوف سنٹر، روبوٹکس لائبریری اور دیگر شعبہ جات کا خصوصی دورہ کیا اور وہاں جاری سائنسی و تحقیقی منصوبوں میں گہری دلچسپی کا اظہار کیا۔ وفد نے منہاج القرآن انٹرنیشنل اور منہاج یونیورسٹی لاہور کی علمی، تحقیقی اور تعلیمی خدمات کو سراہتے ہوئے باہمی علمی، تحقیقی اور بین الاقوامی تعاون کے فروغ کے عزم کا اظہار کیا۔

اس موقع پر نائب ناظمِ اعلیٰ تنظیمات ڈاکٹر محمد رفیق نجم، پرنسپل کالج آف شریعہ اینڈ اسلامک سائنسز پروفیسر ڈاکٹر محمد ممتاز الحسن باروی، ڈائریکٹر فارن افیئرز شکیل احمد طاہر، میجر (ر) سلمان جہانگیر، مرکزی رہنمائوں، کالج آف شریعہ اینڈ اسلامک سائنسز اور منہاج یونیورسٹی لاہور کے فیکلٹی ممبران بھی موجود تھی