ڈیجیٹل دور نے والدین اور بچوں کے تعلقات میں نمایاں تبدیلی پیدا کر دی، روبینہ اشرف

ٹیکنالوجی تبدیلی کے باعث بچوں کو چاہئے والدین کیساتھ زیادہ صبر، ہمدردی اور سمجھ داری کا مظاہرہ کریں، اداکارہ

جمعرات 16 جولائی 2026 00:04

کراچی (اُردو پوائنٹ اخبارتازہ ترین - این این آئی۔ 15 جولائی2026ء) سینئر اداکارہ روبینہ اشرف نے کہا ہے کہ ڈیجیٹل دور نے والدین اور بچوں کے تعلقات میں نمایاں تبدیلی پیدا کر دی ہے، جہاں اب بچے اپنے والدین کو نئی ٹیکنالوجی سکھانے والے بن چکے ہیں۔نجی ٹی وی شو میں گفتگو کرتے ہوئے روبینہ اشرف نے کہا کہ پہلے میں کسی رہنمائی کلئے اپنی والدہ سے رجوع کرتی تھی، لیکن اب اگر مجھے پاس ورڈ، اکائونٹ یا کسی نئی ایپ کے استعمال میں مدد درکار ہو تو میں اپنے بچوں سے رابطہ کرتی ہوں۔

انہوں نے کہا کہ اب نسلوں کا کردار بدل گیا ہے، پہلے ہم اپنی ماں سے مدد لیتے تھے، آج ہم اپنے بچوں سے پوچھتے ہیں کہ اکائونٹ کیسے بنانا ہے یا پاس ورڈ کیسے سنبھالنا ہے۔روبینہ اشرف کا کہنا ہے کہ ہماری نسل مصنوعی ذہانت اور جدید ڈیجیٹل ٹیکنالوجی سے اتنی مانوس نہیں، جبکہ آج کے بچے اسی ماحول میں پروان چڑھے ہیں۔

(جاری ہے)

انہوں نے کہا کہ اس تبدیلی کے باعث بچوں کو چاہیے کہ وہ اپنے والدین کے ساتھ زیادہ صبر، ہمدردی اور سمجھ داری کا مظاہرہ کریں۔

اداکارہ نے ایک ذاتی واقعہ شیئر کرتے ہوئے بتایا کہ وینس کی سیر کے دوران گونڈولا کی سواری کرتے ہوئے ایک خوبصورت لمحہ گانے کے ساتھ ریکارڈ کرنا چاہتی تھی، لیکن بیٹی نے اسے کرنج قرار دے کر انکار کر دیا، جس سے مجھے بہت دکھ پہنچا۔روبینہ اشرف نے کہا کہ مجھے اس بات سے تکلیف ہوتی ہے جب بچے کیمرہ آن ہوتے ہی اپنا چہرہ چھپانے لگتے ہیں۔گفتگو کے دوران انہوں نے والدین کی قربانیوں، خاندانی اقدار اور بچوں کی ذمے داریوں پر بھی زور دیا۔ انہوں نے کہا کہ چونکہ والدین اپنی پوری زندگی بچوں کی پرورش میں صرف کر دیتے ہیں، اس لیے بچوں کو بھی ان کے ساتھ عزت، ہمدردی اور احترام سے پیش آنا چاہیے۔