پشاور ۔ مشیربرائے کھیل و امورِ نوجوانان تاج محمد خان ترند کا سوات کا دورہ

جمعرات 16 جولائی 2026 17:15

پشاور (اُردو پوائنٹ اخبارتازہ ترین - اے پی پی۔ 16 جولائی2026ء) وزیر اعلیٰ خیبر پختونخوا کے مشیر برائے کھیل و امورِ نوجوانان تاج محمد خان ترند نے جمعرات کو ضلع سوات کا دورہ کیا۔محکمہ کھیل خیبرپختونخوا تر جمان کے مطابق دورے میں انہوں نے مختلف کھیلوں کے منصوبوں اور سپورٹس انفراسٹرکچر کا تفصیلی معائنہ کیا۔دورے کے دوران مشیر کھیل نے گراسی کرکٹ گراؤنڈ، مینگورہ فٹبال گراؤنڈ، سول آفیسرز کلب اور انڈور فیمیل جمنازیم کا دورہ کیا اور جاری ترقیاتی کاموں اور دستیاب سہولیات کا جائزہ لیا۔

اس موقع پر سیکرٹری کھیل و امورِ نوجوانان محمد آصف، ڈائریکٹر ورکس احمد علی، رکن صوبائی اسمبلی فضل حکیم، ڈیڈک چیئرمین اختر خان، ریجنل سپورٹس آفیسر ڈاکٹر حضرت اللہ خٹک اور ضلعی انتظامیہ کے دیگر افسران بھی ان کے ہمراہ موجود تھے۔

(جاری ہے)

ریجنل سپورٹس آفیسر ڈاکٹر حضرت اللہ خٹک نے مشیر کھیل کو جاری منصوبوں، ان کی پیش رفت اور آئندہ منصوبہ بندی کے حوالے سے تفصیلی بریفنگ دی۔

بریفنگ کے دوران بتایا گیا کہ گراسی کرکٹ گراؤنڈ کا منصوبہ جون 2027 تک مکمل کر لیا جائے گا، جبکہ اس منصوبے کے لیے رواں مالی سال کے فنڈز بھی جاری کر دئیے گئے ہیں، جس کے بعد تعمیراتی سرگرمیوں میں مزید تیزی آئے گی۔مشیر کھیل تاج محمد خان ترند نے متعلقہ حکام کو ہدایت کی کہ تمام ترقیاتی منصوبوں کو مقررہ معیار اور مقررہ مدت کے اندر مکمل کیا جائے تاکہ نوجوانوں کو جدید اور معیاری کھیلوں کی سہولیات میسر آسکیں۔ انہوں نے اس عزم کا اظہار کیا کہ خیبر پختونخوا حکومت وزیر اعلیٰ کی قیادت میں صوبے بھر میں کھیلوں کے فروغ، نوجوانوں کو مثبت سرگرمیوں کی طرف راغب کرنے اور جدید سپورٹس انفراسٹرکچر کی فراہمی کے لیے بھرپور اقدامات جاری رکھے گی۔