لاہور ہائیکورٹ میں موسم گرما کی تعطیلات کے لیے ججز کا روسٹر جاری

ہفتہ 1 اگست 2026 14:33

لاہور (اُردو پوائنٹ اخبارتازہ ترین - اے پی پی۔ 01 اگست2026ء) لاہور ہائیکورٹ میں موسم گرما کی تعطیلات کے پانچویں ہفتے کے لیے ججز کا روسٹر جاری کر دیا گیا ہے، جس کا اطلاق 3 اگست پیر سے ہوگا۔چیف جسٹس لاہور ہائیکورٹ کی منظوری سے ایڈیشنل رجسٹرار (جوڈیشل) سید شبیر حسین شاہ کی جانب سے جاری کیے گئے روسٹر کے مطابق پرنسپل سیٹ لاہور میں دو ڈویژن بنچ تمام نوعیت کی اپیلوں کی سماعت کریں گے، جبکہ پانچ ججز بطور سنگل بنچ مختلف نوعیت کے مقدمات کی سماعت کریں گے۔

ڈویژن بنچز میں شامل ججز سنگل بنچ کے طور پر بھی کیسز سنیں گے۔ روسٹر کے مطابق چیف جسٹس لاہور ہائیکورٹ کی سربراہی میں دو رکنی بنچ تمام نوعیت کی اپیلوں کی سماعت کرے گا، جبکہ جسٹس مرزا وقاص رئوف کی سربراہی میں قائم ڈویژن بنچ بھی تمام نوعیت کی اپیلوں کی سماعت کرے گا۔

(جاری ہے)

سنگل بنچز میں چیف جسٹس تمام نوعیت کی درخواستوں، جسٹس شاہد کریم سول نوعیت کی درخواستوں، جسٹس مرزا وقاص رئوف تمام نوعیت کی درخواستوں، جسٹس صادق محمود خرم فوجداری نوعیت کی درخواستوں اور جسٹس سید احسن رضا کاظمی تمام نوعیت کی سول درخواستوں کی سماعت کریں گے۔

علاقائی بنچوں میں جسٹس احمد ندیم ارشد بہاولپور، جسٹس خالد اسحاق ملتان اور جسٹس صداقت علی خان راولپنڈی بنچ پر بطور سنگل بنچ مقدمات کی سماعت کریں گے۔ روسٹر کے مطابق عدالتی تعطیلات کے دوران صرف اہم اور فوری نوعیت کی درخواستیں دائر کی جا سکیں گی، جبکہ لاہور ہائیکورٹ میں موسم گرما کی تعطیلات ستمبر کے پہلے ہفتے میں اختتام پذیر ہوں گی۔