جنوبی افریقا کو دوسرے ون ڈے انٹرنیشنل میں شکست دیکر سیریز میں جاندار کم بیک کریں گے، مچل مارش

جمعہ 25 ستمبر 2026 22:02

جوہانسبرگ(اُردو پوائنٹ اخبارتازہ ترین - این این آئی۔ 25 ستمبر2026ء) آسٹریلیا کرکٹ ٹیم کے مایہ ناز اوپننگ بلے باز اور کپتان مچل مارش نے کہا ہے کہ میزبان جنوبی افریقا کے ہاتھوں ابتدائی ایک روزہ بین الاقوامی کرکٹ میچ میں شکست کے باوجود ٹیم کے حوصلے پست نہیں ہوئے، میزبان ٹیم کو دوسرے میچ میں شکست دیکر سیریز میں جاندار کم بیک کریں گے۔ میڈیا سے گفتگو میں مچل مارش نے کہا کہ انکی ٹیم نے پروٹیز ٹیم کے خلاف دوسرے میچ کے لئے حکمت عملی تیار کر رکھی ہے۔

34 سالہ مچل مارش نے کہا کہ میزبان ٹیم نے پہلے میچ میں اچھا کھیل پیش کرتے ہوئے کامیابی حاصل کی ،تاہم ٹیم کو دوسرے میچ میں کارکردگی کو مزید بہتر بنانا ہوگا۔ کینگروز ٹیم کے اوپننگ بلے باز اور کپتان نے مزید کہا کہ وہ پروٹیز کے خلاف دوسرے میچ شاندار کارکردگی کا مظاہرہ کرتے ہوئے اپنی ٹیم کی فتح میں اہم کردار ادا کریں گے۔

(جاری ہے)

مچل مارش نے کہا کہ وہ مکمل طور پر فٹ ہیں اور جنوبی افریقا کے خلاف سیریز کے دوسرے میچ میں شرکت کے لئے بے تاب ہیں۔

ایک سوال کے جواب میں انہوںنے کہاکہ سیریز کے پہلے میچ میں میزبان ٹیم کے ہاتھوں شکست کے باوجود ٹیم کے حوصلے پست نہیں ہوئے، دوسرے میچ میں کامیابی حاصل کرکے سیریز میں جاندار کم بیک کریں گے ۔ انہوں نے کہا کہ بلاشبہ میزبان ٹیم کو اس کی سرزمین پر شکست دینا آسان نہیں ہے تاہم انہوں نے کہا کہ جنوبی افریقا کے خلاف سیریز میں کم بیک کرنے کے لئے ٹیم کو تینوں شعبوں میں سو فیصد کارکردگی کا مظاہرہ کرنا ہوگا۔