لنڈے کا کالا کوٹ پہن کر کوئی وکیل نہیں بن جاتا، کیپٹن ریٹائرڈ صفدر

کسی پر کیچڑ نہیں اچھالوں گا میری یہ تربیت نہیں ہے، ون پوائنٹ ایجنڈا ہے ڈگری دکھا دو، آپ کیلئے مٹھائی لائیں گے، آپ کو بری امام سرکار لے جا کر چادر چڑھائیں گے؛ مسلم لیگ ن کے رہنماء کی میڈیا سے گفتگو

ساجد علی منگل 29 ستمبر 2026 14:54

لنڈے کا کالا کوٹ پہن کر کوئی وکیل نہیں بن جاتا، کیپٹن ریٹائرڈ صفدر

اسلام آباد (اُردو پوائنٹ اخبارتازہ ترین۔ 29 ستمبر 2026ء) مسلم لیگ ن کے رہنما کیپٹن ریٹائرڈ صفدر نے وکلاء کی ڈگریوں اور بار کونسل کے الیکشنز کے تنازعہ پر اپنا سخت ردِعمل دیتے ہوئے کہا ہے کہ لنڈے کا کالا کوٹ پہن لینے سے کوئی شخص وکیل نہیں بن جاتا، میرا ون پوائنٹ ایجنڈا صرف یہ ہے کہ جن پر سوال اٹھے ہیں وہ اپنی اصلی ڈگری دکھا دیں، ہم خود ان کے گھر مٹھائی لے کر جائیں گے۔

میڈیا سے گفتگو کرتے ہوئے انہوں نے کہا کہ میں کسی پر کیچڑ نہیں اچھالوں گا کیونکہ میری ایسی تربیت نہیں ہے اور نہ ہی میں اخلاق سے گری ہوئی کوئی بات کروں گا لیکن میری ایک ہی سادہ اور واضح شرط ہے کہ آپ بس اپنی تعلیمی و قانونی ڈگری دکھا دیں، اگر آپ ڈگری دکھا دیتے ہیں تو ہم آپ سے معافی بھی مانگیں گے، آپ کے گھر خوشی سے مٹھائی بھی لے کر آئیں گے اور آپ کو بری امام سرکار کے دربار لے جا کر عزت کے ساتھ چادر بھی چڑھائیں گے۔

(جاری ہے)

کوئی بندہ لنڈے کا کالا کوٹ پہن کر وکیل نہیں بن سکتا، کیپٹن صفدر ایکشن میں pic.twitter.com/rAIBbT8Ef9
— Nadir Baloch (@BalochNadir5) September 29, 2026

کیپٹن ریٹائرڈ صفدر نے وکلاء برادری اور بار کی سیاست پر بات کرتے ہوئے کہا کہ لنڈے کا کالا کوٹ پہن کر گھومنے سے کوئی شخص قانون دان یا وکیل نہیں بن جاتا۔ ڈگری تو ہر صورت دکھانی ہی پڑے گی، اعظم نذیر تارڑ بالکل ٹھیک کہہ رہے ہیں کہ جو لوگ وکیل نہیں ہیں وہ بار کی سیاست سے دور رہیں، میرا بھی یہی چٹان جیسا موقف ہے کہ جن افراد کے پاس وکالت کی قانونی ڈگری موجود نہیں ہے، انہیں بار کے الیکشنز سے مکمل طور پر پرے اور دور رہنا چاہیے۔