فائرسیفٹی آڈٹ کا فیصلہ، نجی اداروں سمیت سکولز، ہسپتالوں، ہوٹلز اورپٹرول پمپس کی چیکنگ ہوگی

مظفرآباد (اُردو پوائنٹ اخبارتازہ ترین - این این آئی۔ 30 ستمبر2026ء) فائر سیفٹی آڈٹ کا فیصلہ، نجی اداروں سمیت سکولز، ہسپتالوں، ہوٹلز اور پٹرول پمپس کی چیکنگ ہوگی، حکومت آزاد کشمیر کی جانب سے عوامی تحفظ اور آتشزدگی کے ممکنہ واقعات سے بروقت نمٹنے کے لیے فائر سیفٹی کے اقدامات کو مؤثر بنانے کا فیصلہ کیا گیا ہے۔ اس سلسلے میں ڈپٹی کمشنر مظفرآباد کی نگرانی میں مختلف سرکاری و نجی اداروں اور کاروباری مراکز کے فائر سیفٹی آڈٹ اور حفاظتی انتظامات کی جانچ پڑتال کے لیے خصوصی کمیٹی تشکیل دے دی گئی ہے۔

ذرائع کے مطابق کمیٹی میں تحصیلدار مظفرآباد ذیشان قریشی، سول ڈیفنس کے نمائندے اور ریسکیو 1122 کے انچارج رانا ظہیر شامل ہیں، جو مختلف مقامات کا دورہ کرکے وہاں موجود فائر سیفٹی انتظامات، ہنگامی آلات اور آتشزدگی کی صورت میں فوری کارروائی کے لیے دستیاب سہولیات کا جائزہ لیں گے۔

(جاری ہے)

فائر سیفٹی آڈٹ کے دوران پرائیویٹ دفاتر، سکولز، کالجز، ہسپتالوں، شادی ہالز، ہوٹلز، گیسٹ ہاؤسز اور پٹرول پمپس سمیت دیگر حساس اور عوامی مقامات کا معائنہ کیا جائے گا۔

متعلقہ کمیٹی ان مقامات پر فائر ایکسٹنگوشرز، ایمرجنسی آلات، فائر الارم، ہنگامی اخراج کے راستوں اور دیگر ضروری حفاظتی انتظامات کی موجودگی اور قابل استعمال حالت کو چیک کرے گی۔حکام کی جانب سے اس امر کا بھی جائزہ لیا جائے گا کہ متعلقہ اداروں اور کاروباری مراکز میں آتشزدگی کی صورت میں لوگوں کے محفوظ انخلاء، ابتدائی سطح پر آگ پر قابو پانے اور ریسکیو ٹیموں کے لیے بروقت رسائی کے مناسب انتظامات موجود ہیں یا نہیں۔

ذرائع کے مطابق فائر سیفٹی آڈٹ کا بنیادی مقصد کسی بھی ممکنہ حادثے سے قبل حفاظتی خامیوں کی نشاندہی کرکے انہیں دور کروانا اور عوامی مقامات پر حفاظتی معیار کو بہتر بنانا ہے۔ بالخصوص سکولز، کالجز، ہسپتالوں، شادی ہالز اور ہوٹلز میں بڑی تعداد میں شہریوں کی موجودگی کے باعث فائر سیفٹی انتظامات کی باقاعدہ جانچ کو اہم قرار دیا جا رہا ہے۔

کمیٹی معائنے کے دوران سامنے آنے والی خامیوں اور عدم دستیاب سہولیات کی نشاندہی کرے گی اور متعلقہ اداروں کو ضروری حفاظتی اقدامات مکمل کرنے کے حوالے سے ہدایات اور سفارشات پیش کرے گی۔ پٹرول پمپس سمیت آتش گیر مواد سے متعلق حساس مقامات پر حفاظتی اصولوں، ہنگامی صورتحال سے نمٹنے کے انتظامات اور فائر فائٹنگ آلات کو خصوصی طور پر چیک کیا جائے گا۔

انتظامیہ کے مطابق فائر سیفٹی صرف حادثے کے بعد ریسکیو کارروائی تک محدود نہیں بلکہ پیشگی حفاظتی اقدامات، بروقت نشاندہی اور عوامی آگاہی اس کا اہم حصہ ہیں۔ اس لیے مختلف اداروں اور کاروباری مراکز میں فائر سیفٹی انتظامات کو مؤثر بنانا ضروری ہے تاکہ کسی بھی ہنگامی صورتحال میں انسانی جانوں اور املاک کے نقصان کو کم سے کم کیا جا سکے۔انتظامیہ نے متعلقہ اداروں، مالکان اور منتظمین پر زور دیا ہے کہ وہ فائر سیفٹی کے حوالے سے اپنی ذمہ داریاں پوری کریں، ہنگامی آلات کو فعال حالت میں رکھیں اور کسی بھی ممکنہ حادثے سے نمٹنے کے لیے ضروری حفاظتی انتظامات مکمل رکھیں۔