پنجاب کی طرح آزادکشمیر میں بھی تعمیر و ترقی کا عمل گراؤنڈ پر نظر آئے گا، عمیرنعیم خان

میرپور(اُردو پوائنٹ اخبارتازہ ترین - این این آئی۔ 30 ستمبر2026ء) آزادکشمیر کے وزیر ایلیمنٹری اینڈ سیکنڈری ایجوکیشن انجینئر عمیر نعیم خان نے کہا ہے کہ مسلم لیگ(ن) کی حکومت تعمیر و ترقی، عوامی فلاح و بہبود اور ریاست کی خوشحالی کا واضح ایجنڈا لے کر اقتدار میں آئی ہے۔ حکومت زبانی دعوؤں کے بجائے عملی اقدامات اور عوام کو ریلیف کی فراہمی پر یقین رکھتی ہے۔

آنے والے دنوں میں آزادکشمیر کے عوام کو تعمیر و ترقی کے حوالے سے ایک واضح اور مثبت تبدیلی نظر آئے گی۔ ان خیالات کا اظہار انہوں نے مختلف عوامی وفود سے گفتگو کرتے ہوئے کیا۔ انہوں نے کہا کہ حکومت نے ریاست میں ترقیاتی عمل کو تیز کرنے اور عوامی ضروریات کو ترجیحی بنیادوں پر پورا کرنے کے لیے جامع حکمت عملی اختیار کی ہے۔

(جاری ہے)

سڑکوں، تعلیمی اداروں، صحت، بنیادی ڈھانچے اور دیگر عوامی سہولیات کی بہتری پر خصوصی توجہ دی جا رہی ہے تاکہ عام آدمی کو براہِ راست اس کے ثمرات حاصل ہوں۔

انجینئر عمیر نعیم خان نے کہا کہ پنجاب میں جس انداز سے ترقیاتی منصوبوں کو عملی شکل دے کر عوامی سہولیات میں اضافہ کیا گیا ہے، اسی طرز پر آزادکشمیر میں بھی تعمیر و ترقی کا عمل گراؤنڈ پر نظر آئے گا۔ حکومت کا مقصد ایسے منصوبے مکمل کرنا ہے جو عوام کی روزمرہ زندگی میں آسانی پیدا کرنے کے ساتھ ساتھ ریاست کی مجموعی ترقی میں بھی معاون ثابت ہوں۔

انہوں نے کہا کہ حکومت کے پاس واضح وژن، پالیسی اور ترقیاتی ترجیحات موجود ہیں۔ تمام متعلقہ اداروں کو ہدایت کی گئی ہے کہ ترقیاتی منصوبوں میں معیار، شفافیت اور رفتار کو یقینی بنایا جائے اور عوامی مفاد کو اولین ترجیح دی جائے۔ وزیر ایلیمنٹری اینڈ سیکنڈری ایجوکیشن نے کہا کہ تعلیم حکومت کی بنیادی ترجیحات میں شامل ہے۔ تعلیمی اداروں میں سہولیات کی بہتری، معیارِ تعلیم میں اضافہ اور طلبہ کو جدید تقاضوں سے ہم آہنگ تعلیمی ماحول کی فراہمی کے لیے اقدامات کیے جا رہے ہیں۔

حکومت چاہتی ہے کہ آزادکشمیر کا ہر بچہ معیاری تعلیم کے حصول کے لیے یکساں مواقع سے مستفید ہو۔ انجینئر عمیر نعیم خان نے مزید کہا کہ مسلم لیگ(ن) کی حکومت عوام سے کیے گئے وعدوں کو عملی اقدامات میں تبدیل کرنے کے لیے پرعزم ہے۔ حکومت کی کارکردگی کا اصل پیمانہ عوام کو حاصل ہونے والی سہولیات اور گراؤنڈ پر مکمل ہونے والے ترقیاتی منصوبے ہوں گے۔ انہوں نے اس عزم کا اظہار کیا کہ مختصر مدت میں آزادکشمیر میں تعمیر و ترقی کے عمل میں نمایاں بہتری دکھائی دے گی اور عوام ایک بدلا ہوا آزادکشمیر دیکھیں گے۔