وادی ء نیلم میں پانچ نئے سیاحتی پارکس کے قیام کی غرض سے سروے کا آغاز کر دیا گیا

بدھ 30 ستمبر 2026 16:57

نیلم (اُردو پوائنٹ اخبارتازہ ترین - این این آئی۔ 30 ستمبر2026ء) حکومت آزاد جموں و کشمیر کے 100 روزہ اصلاحی پلان کے تحت وادی نیلم میں سیاحتی سہولیات اور انفراسٹرکچر کی ترقی کے لیے پانچ نئے سیاحتی پارکس کے قیام کی غرض سے سروے کا آغاز کر دیا گیا ہے۔ محکمہ سیاحت و آثار قدیمہ کی نگرانی میں نیسپاک (NESPAK) کی ٹیم مختلف مقامات کا تکنیکی و سیاحتی موزونیت کے حوالے سے جائزہ لے رہی ہے۔

یہ سروے وزیر سیاحت عبدالرحمن آرائیں، سیکرٹری محکمہ سیاحت و آثار قدیمہ محمد انصیر یعقوب اور ڈائریکٹر جنرل سیاحت شاہد کھوکھر کی ہدایات کی روشنی میں شروع کیے گئے ہیں، جس کا مقصد وادی نیلم میں سیاحوں کے لیے جدید، منظم اور پائیدار سیاحتی سہولیات کی فراہمی کے لیے موزوں مقامات کا تعین کرنا ہے۔

(جاری ہے)

محکمہ سیاحت کے مطابق سیکرٹری سیاحت و آثار قدیمہ محمد انصیر یعقوب نے 10 ستمبر 2026ء کو وادی نیلم کے دورے کے دوران مختلف مقامات کا جائزہ لینے کے بعد کیرن بیلہ ایموزمنٹ پارک، شاردہ بیلہ ایکو ٹورازم پارک، اڑنک بیلہ پارک اور تاؤبٹ بیلہ پارک کے لیے مقامات کو حتمی قرار دیا تھا، جبکہ بابون ویلی کو سیاحتی ہب ٹاپ کے طور پر ترقی دینے کے لیے منتخب کیا گیا۔

اسی سلسلے میں نیسپاک کی تکنیکی ٹیم نے محکمہ سیاحت و آثار قدیمہ کے اسسٹنٹ ڈائریکٹر ملک مرتضیٰ اور متعلقہ عملے کے ہمراہ مذکورہ مقامات کا سروے شروع کر دیا ہے۔سروے کے دوران زمین کی موزونیت،قدرتی خوبصورتی،جغرافیائی صورتحال، رسائی، بنیادی سہولیات، سیاحتی استعداد اور مستقبل میں تعمیراتی و ماحولیاتی تقاضوں سمیت مختلف تکنیکی پہلوؤں کا جائزہ لیا جا رہا ہے۔

محکمہ سیاحت کے حکام کے مطابق سروے کی تکمیل کے بعد تکنیکی سفارشات کی روشنی میں منصوبوں کی آئندہ پیش رفت، ڈیزائن، تعمیراتی ضروریات اور دیگر مراحل کا تعین کیا جائے گا۔ منصوبوں کا مقصد وادی نیلم میں سیاحتی سرگرمیوں کو منظم انداز میں فروغ دینا، سیاحوں کو بہتر سہولیات فراہم کرنا اور مقامی سطح پر سیاحت سے وابستہ معاشی سرگرمیوں کو مزید وسعت دینا ہے۔