ہدایتکار شعیب منصوراورماہرہ خان کی فلم ’’ورنہ ‘‘پر سنسر بورڈ کی تلوار لٹکنے ..
UrduPoint Social

ہدایتکار شعیب منصوراورماہرہ خان کی فلم ’’ورنہ ‘‘پر سنسر بورڈ کی تلوار لٹکنے لگی

, مکمل طور پر پابندی لگانے کا فیصلہ نہیں کیا جارہا ،کچھ سینز کوسنسر کئے جانے کے بعد فلم ریلیز کی جائیگی‘سندھ بورڈ آف فلم سنسر

منگل نومبر 7:32 pm
لاہور(اُردو پوائنٹ اخبارتازہ ترین۔ 14 نومبر2017ء)ہدایتکار شعیب منصوراورماہرہ خان کی فلم ’’ورنہ ‘‘پر سنسر بورڈ کی تلوار لٹکنے لگی جس کے بعد فلم کی ریلیز مشکلات کا شکار ہوگئی۔شعیب منصور کمرشل اورروایتی دھوم دھڑکے کے بجائے حقیقی موضوعات پر فلمیں بنانے کے لیے شہرت رکھتے ہیں۔ ’’ فلم خدا کے لئے ‘‘ اور’’بول ‘‘میں بھی سماجی مسائل کو بہت خوبی سے اجاگر کیا گیا تھا۔

دونوں فلموں کی ریلیز کے طویل عرصے بعد شعیب منصورایک اور شاہکار فلم ’’ ورنہ ‘‘ کی شکل میں لے کر آرہے ہیں جس میں ماہرہ خان اپنی اداکاری کے جوہر دکھاتی ہوئی نظرآئیں گی۔ فلم کا موضوع کافی بولڈ لیکن حقیقت پر مبنی ہے۔ہمارے سماج میں خواتین کے ساتھ زیادتی کرنا اتنا بڑا مسئلہ نہیں مانا جاتا جتنا بڑا مسئلہ اس موضوع پر بات کرنا ہوتا ہے۔

(خبر جاری ہے)

لوگ زیادتی جیسے موضوعات پر بات کرتے ہوئے شرم محسوس کرتے ہیں۔ لیکن شعیب منصور نے بہادری کا ثبوت دیتے ہوئے اس موضوع پرفلم بناڈالی۔ شائقین شعیب منصوراور ماہرہ خان کو ان کی دلیری پر سراہا رہے ہیںجبکہ سنسر بورڈ فلم پر پابندی عائد کرنے کاسوچ رہاہے۔میڈیا رپورٹس کے مطابق فلم کا بولڈ موضوع سندھ

خبر کی مزید تفصیل پڑھئیے

بورڈ آف فلم سنسرکو پسند نہیں آیا۔ ایس بی ایف سی کے جنرل سیکرٹری عبدالرزاق کا کہنا ہے کہ فلم کا موضوع پریشان کن ہے جبکہ کہانی میں خاتون کے ساتھ زیادتی کرنے والے شخص کو گورنر کا بیٹا دکھایا گیا ہے۔

عبدالرزاق نے کہا کہ فلم پر مکمل طور پر پابندی لگانے کا فیصلہ نہیں کیا جارہا بلکہ انہیں فلم کے کچھ سینزپرتحفظات ہیں جنہیں ٹھیک اور سنسر کیے جانے کے بعد فلم ریلیز کی جائے گی۔انہوں نے مزید کہا کہ فلم کو ابھی تک ایس بی ایف سی کی جانب سے سرٹیفکیٹ نہیں ملا ہے اور ہم سینٹرل بورڈ آف فلم سنسرز اسلام آبادکے فیصلے کا انتظار کررہے ہیں۔ دوسری جانب سی بی ایف سی کے چیئرمین مبشر حسن کا کہنا ہے کہ فلم ریلیز سے قبل بورڈ کے ممبران کو دکھائی جائے گی جس کے بعد فلم پر بابندی لگانے یا نہ لگانے کا فیصلہ کیا جائے گا ہم جلد ہی فلم کے بارے میں اپنا حتمی فیصلہ سنائیں گے۔

واضح رہے کہ سنسربورڈ کی جانب سے یہ بیان ایسے وقت سامنے آیا ہے جب فلم کی ریلیزمیں صرف 3 روز باقی ہیں اورفلم میں شامل تمام فنکار خاص طور پر ماہرہ خان زوروشورسے فلم کی تشہیر میں مصروف ہیں۔ فلم رواں ماہ 17 تاریخ کو سینما کی زینت بنے گی۔