92 سالہ میڈیا ٹائیکون مرڈوک پانچویں شادی کے لیے تیار

ماسکو(اُردو پوائنٹ اخبارتازہ ترین - این این آئی۔ 09 مارچ2024ء) میڈیا کے دنیا میں شہنشاہ کا سا مقام رکھنے والے ریوپرٹ مرڈوک 92 سال کے ہوچکے ہیں۔ اس عمر میں بھی وہ جواں سال دل رکھتے ہیں۔ میڈیا ٹائیکون نے اپنی گرل فرینڈ سے منگنی کی ہے اور شادی کا ارادہ رکھتے ہیں۔روس سے تعلق رکھنے والے گرل فرینڈ ایلینا زوکووا 67 سال کی ہیں۔ وہ خرد حیاتیات کی ماہر ہیں۔

غیرملکی خبررساں ادارے کے مطابق ریوپرٹ مرڈوک کی ٹیم نے بتایا ہے کہ شادی رواں سال کیلیفورنیا میں مرڈوک کے موراگا وائن یارڈ میں رکھی گئی ہے۔ یہ ریوپرٹ مرڈوک کی پانچویں شادی ہوگی۔امریکی اخبارنے شادی کی اطلاع دیتے ہوئے بتایا کہ دعوت نامے ارسال کردیے گئے ۔آسٹریلیا سے تعلق رکھنے والے میڈیا ٹائیکون کی زندگی میں اس سے قبل گرل فرینڈ این لیزلی اسمتھ تھی۔

(جاری ہے)

دونوں کی منگنی اپریل 2023 میں ٹوٹ گئی تھی جس کے بعد انہوں نے ایلینا زوکووا سے ڈیٹنگ شروع کردی تھی۔مرڈوک کی سابق بیویوں میں پیٹریشیا بوکر، اینا مان، ونڈی ڈینگ اور امریکی ماڈل اور اداکارہ جیری ہال شامل ہیں۔ایلینا زوکووا روسی ارب پتی بزنس مین الیگزینڈر زوکوف کی اہلیہ رہ چکی ہں۔ ان کی بیٹی داشا بھی بزنس سے وابستہ ہیں۔جن اخبارات اور جرائد کو مرڈوک نے خریدا ان میں نیوز آف دی ورلڈ، دی سن، نیو یارک پوسٹ اور وال اسٹریٹ جرنل شامل ہیں۔

مرڈوک نے 1996 میں فاکس نیوز شروع کیا جو آج امریکا میں سب سے زیادہ دیکھا جانے والا چینل ہے۔مقامی، ملکی اور بین الاقوامی میڈیا کمپنیوں کو کنٹرول کرنے کے لیے مرڈوک نے 2013 میں نیوز کور کی بنیاد رکھی۔ریوپرٹ مرڈوک کی زندگی تنازعات سے بھری رہی ہے۔ گزشتہ برس انہوں نے اپنی میڈیا کمپنیوں کے مرکزی عہدوں سے سبک دوش ہوکر کنٹرول اپنے بیٹے لیکلن کو سونپ دیا۔