معروف اداکارہ پروین بابی شادی شدہ تھیں، مہیش بھٹ کا انکشاف

ممبئی (اُردو پوائنٹ اخبارتازہ ترین - این این آئی۔ 30 اپریل2025ء)معروف بھارتی فلم ڈائریکٹر اور پروڈیوسر مہیش بھٹ نے انکشاف کیا ہے کہ معروف اداکارہ پروین بابی شادی شدہ تھیں، ان کے شوہر پاکستان چلے گئے تھے۔ انکا کہنا ہے کہ انھیں اس بارے میں اس وقت پتہ چلا جب ان کے پروین بابی سے تعلقات تھے۔یاد رہے کہ اپنے عہد کی عظیم اور سب سے زیادہ معاوضہ لینے والی پروین بابی اور مہیش بھٹ جو اس دوران کرن بھٹ کے ساتھ شادی شدہ زندگی گزار رہے تھے، کے درمیان رومانی تعلقات رہے۔

تاہم پروین بابی کی ذاتی زندگی دکھوں سے بھری ہوئی تھی اور اسی وجہ سے وہ ذہنی بیماری سے نبرد آزما تھیں۔ ایک حالیہ انٹرویو میں 76 سالہ مہیش بھٹ نے جونا گڑھ کے شاہی خاندان کی رکن پروین کے ساتھ اپنے افیئرز پر کھل کر گفتگو کی اور انکشاف کیا کہ پروین نے ایک بار شادی کی تھی، جس کے بارے میں کافی بعد میں مجھے بتایا تھا۔

(جاری ہے)

مہیش بھٹ کے مطابق کافی سالوں بعد جب وہ ایک بار پاکستان میں کارا فلم فیسٹول میں شرکت کے لیے گئے تو انھیں بتایا گیا کہ یہاں ایک شخص (پروین بابی کے شوہر)موجود ہیں جو ان سے ملنا چاہتے ہیں۔

لیکن میں ان سے مل نہ سکا، میں نے یہ کبھی نہیں کہا کہ میں ان سے ملنا نہیں چاہتا تھا لیکن ایسا کسی وجہ سے ہو نہ سکا۔ میں سوچتا رہا کہ وہ مجھ سے کیوں ملنا چاہتے ہیں، میں ایسا آدمی نہیں کہ کسی کے لیے اپنا دروازہ بند کروں۔واضح رہے کہ پروین اور مہیش بھٹ کی ملاقات 1977 میں اس وقت ہوئی جب پروین اپنے عروج پر تھیں، تاہم تین سال بعد دونوں کے درمیان بریک اپ ہوگیا۔ پروین بابی 2005 میں 55 برس کی عمر میں ممبئی میں اپنے فلیٹ میں مردہ پائی گئی تھیں۔