نصرت فتح علی خان کی برسی ،پرستاروں کی آخری آرام گاہ پر حاضری، پھولوں کی چادر چڑھائی اور فاتحہ خوانی کی

فیصل آباد (اُردو پوائنٹ اخبارتازہ ترین - اے پی پی۔ 16 اگست2025ء) دنیا بھر میں فن گائیکی کے حوالے سے پاکستان کا نام روشن کرنیوالے لیجنڈاستاد نصرت فتح علی خان کی 28ویں برسی ہفتہ کو منائی گئی۔اس موقع پران کے فیملی ممبران، شاگردوں، ان کے فن کے دلدادہ سمیت سول سوسائٹی کے افراد نے جھنگ روڈ فیصل آباد پر واقع مرکزی قبرستان میں ان کی آخری آرام گاہ پرحاضری دی، پھولوں کی چادریں چڑھائیں اور فاتحہ خوانی کی۔

نصرت فتح علی خان13اکتوبر 1948کو فیصل آباد میں پیدا ہوئے ، آپ کے والد استاد فتح علی خان اور چچا استاد مبارک علی خان اپنے دور کے مشہور قوال تھے۔نصرت فتح علی خان نے بھی بطور قوال دم مست قلندرمست مست سے ملک گیر شہرت حاصل کی۔انہوں نے قوالی کی صنف میں مغربی انداز متعارف کروایا جسے دنیا بھر میں بھرپور پذیرائی حاصل ہوئی۔

(جاری ہے)

ان کی گائی ہوئی قوالی ”علی مولا علی مولا“ سے انہیں بے پناہ شہرت حاصل ہوئی جبکہ ان کے گائے گیت ”سن چرخے دی مٹھی مٹھی کوک“ نے انہیں شہرت کی بلندیوں تک پہنچا دیا۔

نصرت فتح علی خان نے بطور قوال خوب شہرت کمائی جس پر ہالی وڈ کے معروف میوزک کمپوزر پیٹر گبریل نے انکے ساتھ ملکر کام کرنے کا منصوبہ بنایا ا ور دونوں نے ملکر مشرقی و مغربی موسیقی کا ملاپ کرکے دم مست قلندر جیسی شہرہ آفاق قوالی تخلیق کی جس نے نصرت فتح کی شہرت کو چہار دانگ عالم میں پھیلا دیا۔نصرت فتح علی خان نے بحیثیت قوال 125آڈیو البم ریلیز کئے جو کہ ایک ورلڈ ریکارڈ ہے۔

پاکستان کیساتھ ساتھ کئی ممالک کی حکومتوں اور اقوام متحدہ نے انکی شاندار فنی خدمات کا اعتراف کرتے ہوئے انہیں متعدد سرکاری اعزازات سے نوازا۔جگر و گردوں کے عارضہ سمیت مختلف امراض میں مبتلا ہونے کے باعث صرف 49سال کی عمر میں 16اگست 1997کو شہنشاہ قوالی نصرت فتح علی خان اپنے کروڑوں مداحوں کو داغ مفارقت دے گئے۔ ان کی وفات سے گلوکاری کے میدان میں پیدا ہونے والا خلا مدتوں پورا نہ ہو سکے گا۔