بلوچستان میں تباہی مچ گئی، ہنگامی حالت نافذ

کوئٹہ(اُردو پوائنٹ اخبارتازہ ترین۔ 21 فروری2019ء) بلوچستان میں تباہی مچ گئی، ہنگامی حالت نافذ، بلوچستان میں بارشوں سے کئی علاقوں میں تباہی مچ گئی،  افراد جاں بحق، متاثرہ علاقوں میں ایمرجنسی نافذ، پاک فوج کا ریسکیو آپریشن میں حصہ لینے کا اعلان۔ تفصیلات کے مطابق بلوچستان میں مکران اور قلات ڈویژن سمیت متعدد علاقوں میں بارشوں کے بعد سیلابی صورتحال ہے ،جہاں ایمرجنسی نافذ کردی گئی۔

اس ضمن میں ڈپٹی کمشنر لسبیلہ شبیر مینگل نے کہا ہے کہ اوتھل میں سیلابی صورتحال کے باعث 4 افراد لاپتہ ہوگئے جبکہ ریسکیو ذرائع کے مطابق برساتی ریلے میں بہنے والے 2 افراد کی لاشیں نکال لی گئی ہیں۔ شبیر مینگل نے کہا کہ صورتحال کنٹرول میں ہے ،بارشوں میں ہونے والے نقصان کا تخمینہ لگایا جارہا ہے۔

(جاری ہے)

ضلع آواران میں شدید بارش کے باعث ملار بند کو شدید نقصان پہنچا جبکہ ضلع کا مواصلاتی رابطہ بھی منقطع ہوگیا۔

ترجمان صوبائی حکومت کے مطابق وزیراعلیٰ نے امدادی سرگرمیوں کے لیے ہیلی کاپٹر استعمال کرنے کی ہدایت کردی جبکہ پاک فوج کے بھی 4 ہیلی کاپٹر امدادی سرگرمیوں میں حصہ لیں گے۔ جبکہ پروونشل ڈیزاسٹر مینجمنٹ اتھارٹی نے کہا ہے کہ بارش سے متاثرہ علاقوں میں امدادی سرگرمیاں شروع کردی گئیں۔ جبکہ صوبائی حکومت اور ضلعی انتظامیہ سے رابطے میں ہیں اور پی ڈی ایم اے کے ملازمین کی چھٹیاں بھی منسوخ کردی گئی ہیں۔

گزشتہ روز بارش کے بعد سیلابی ریلوں سے متاثر ہونے والی تربت، ہوشاب اور لسبیلہ میں مختلف شاہراہوں کی بحالی کا کام بھی شروع کردیا گیا ہے۔خضدار میں سب سے زیادہ 41 ملی میٹر بارش ریکارڈ کی گئی جہاں برساتی نالے بپھر گئے جبکہ مکران اور ضلع لسبیلہ میں ایمرجنسی نافذ کردی گئی ،جہاں پھنسے لوگوں کو نکالنے کے لیے ریسکیو ٹیمیں روانہ کردی گئیں۔

شمالی بلوچستان میں طوفانی بارشوں کا سلسلہ تھم گیا تاہم ندی نالوں میں سیلابی صورتحال ہے اور سیلابی ریلے سے رابطہ سڑکوں کو شدید نقصان، ضلعی انتظامیہ چمن کا کہنا ہے کہ بارش کے بعد 40 سے زائد مکانات کو نقصان پہنچا۔وادی زیارت، توبہ اچکزئی، توبہ کاکڑی اور کان مہترزئی میں برفباری کے بعد آمد و رفت کی بحالی کے لیے برف ہٹانے کا کام جاری ہے۔ حب ڈیم انتظامیہ کے مطابق رات گئے ہونے والی بارش سے ڈیم میں پانی کی سطح ڈیڑھ فٹ تک بلند ہوگئی اور ڈیم میں اس وقت ڈھائی فٹ پانی کا ذخیرہ موجود ہے۔ محکمہ موسمیات کے مطابق لسبیلہ میں 28، سبی 21، تربت 18، قلات میں 15، گوادر میں 13، ڑوب 12، جیوانی 4 اور پنجگور میں ایک ملی میٹر بارش ریکارڈ کی گئی ہے۔