Photos of Owais Ahmed Ghani

صوبہ خیبر پختونخواہ کے سابقہ گورنر۔ اس سے پہلے وہ بلوچستان کے گورنر رہے۔ اس دور میں بلوچستان میں باقاعدہ فوج کشی ہوئی اور بلوچوں کے دو اہم رہنماء نواب اکبر خان بگٹی اور بالاچ مری کو ہلاک کردیا گیا۔ نواب بگٹی کے صاحبزادے نے جنرل ریٹائرڈ پرویز مشرف اور ان کے ساتھیوں کے خلاف جو ایف آئی آر درج کرائی ہے اس میں اویس احمد غنی کا نام بھی شامل تھا۔ اویس احمد غنی کا تعلق چونکہ سردار عبدالرب نشتر کے خاندان سے تھا اور اس خاندان کے زیادہ تر افراد فوج اور دیگر سرکاری اداروں میں ہیں لہٰذا اس پسِ منظر کو ذہن میں رکھتے ہوئے جنرل ریٹائرڈ پرویز مشرف نے نواز شریف کا تختہ الٹنے کے بعد انہیں پہلے صوبائی وزیر صنعت پھر وفاقی وزیر اور اس کے بعد بلوچستان اور صوبہ سرحد کا گورنر تعینات کیا۔انہیں دو ہزار تین میں بلوچستان کا گورنر مقرر کیا گیا تھا اور چونکہ ان کا تعلق کاکڑ قبیلے سے ہے اور ان کے آباؤ اجداد بلوچستان کے ضلع ژوب سے ہجرت کرکے پشاور آئے تھے لہٰذا تعیناتی کے وقت بلوچ اور پشتونوں کے ممکنہ اعتراض کو رفع کرنے کے لیے سرکاری طور پر انہیں بلوچستان کا مقامی ثابت کرنے کے لیے میڈیا پر سرکاری طور پر باقاعدہ ایک مہم چلائی گئی ۔پاکستان کے قبائلی علاقوں میں دہشت گردی کیخلاف جنگ کے دوران جب اس وقت کے صوبہ خیبر پختونخواہ کے گورنر لیفٹیننٹ جنرل علی جان اورکزئی کے مرکزی حکومت کے ساتھ اختلافات پیدا ہوئے تھے تو جنرل ریٹائرڈ پرویز مشرف نے اویس احمد غنی کو جنوری دوہزار آٹھ میں صوبہ سرحد کا نیا گورنر مقرر کیا۔ پرویز مشرف کی اقتدار سے رخصتی کے بعد وہ دو سال مزید صوبے کے گورنر رہے۔ لیکن حکومت پر فاٹا ارکان اور خود پیپلز پارٹی کی جانب سے شدید دباؤ رہا کہ ان کو اس عہدے سے سبکدوش کیا جائے۔ یوں فروری 2011 میں ان کو اس عہدے سے ہٹا دیا گیا۔ ان کی جگہ بیرسٹر مسعود کوثر کو گورنر تعینات کیا گیا۔