سعودی عرب ، رمضان المبارک کے دوران درجہ حرارت 65 ڈگری سینٹی گریڈ تک پہنچنے کا امکان

جدہ (اُردو پوائنٹ اخبار تازہ ترین۔ 02 جون۔2015ء) سعودی عرب میں رمضان المبارک کے دوران بہت سے علاقوں میں درجہ حرارت 65 ڈگری سنٹی گریڈ تک پہنچ جانے کا امکان ظاہر کیا گیا ہے۔میڈیا رپورٹس کے مطابق سعودی عرب کے ایک ماہرِ موسمیات عبدالرحمان محمد الغامدی نے پیش گوئی کی ہے کہ سائے میں درجہ حرارت 50 ڈگری سینٹی گریڈ تک جبکہ دھوپ میں تقریباً 65 ڈگری سینٹی گریڈ تک پہنچ سکتا ہے۔

(جاری ہے)

اس لیے کہ زیادہ سے زیادہ درجہ حرارت اب تک کیلی فورنیا کی وادی موت میں 56.7 ڈگری سینٹی گریڈ تک ریکارڈ کیا گیا ہے۔عبدالرحمان محمد الغامدی نے کہا کہ ”21 جون سے موسم گرما زمین کے شمالی نصف کرّہ میں داخل ہوجائے گا، جب سورج کی شعاعوں کا رْخ عمودی ہوگا، چنانچہ سعودی عرب کے بہت سے علاقے شدید گرمی کی زد میں ہوں گے۔‘انہوں نے کہا کہ بحرہند سے گرم اور مرطوب دباوٴ کے ساتھ زیادہ سے زیادہ درجہ حرارت باہم مل کر اس دوران گرمی کے احساس میں اضافہ کردے گا۔ان کا کہنا تھا کہ شدید درجہ حرارت کے اضافے میں فیکٹریوں اور کاروں سے کاربن کا اخراج جیسے دیگر عوامل بھی شامل ہوسکتے ہیں۔