ْگلگت بلتستان کے تمام اضلاع میں بارش اور برف باری جاری، لینڈ سلائیڈنگ سے رابطہ سڑکیں بند

استور ۔ (اُردو پوائنٹ اخبارتازہ ترین - اے پی پی۔ 27 جنوری2017ء) گلگت بلتستان کے تمام اضلاع میں بارشوں اور برف باری کاسلسلہ مسلسل جاری ہے ،تیز بارش اور برف باری کے باعث جہاں سردی کی شدت میں اضافہ ہو گیا ہے وہاں ضلع استور کا ملک کے دیگر حصوں سے زمینی رابطہ منقطع ہو کر رہ گیا ہے جبکہ لینڈ سلائیڈنگ کی وجہ سے شاہراہ استور،شاہراہ قراقرم ،شاہراہ سکردو اور استور کی تمام رابطہ سڑکیں ہر قسم کی ٹریفک کے لئے بند ہو چکی ہیں ۔

(جاری ہے)

اس سلسلے میں پی ڈبلیو ڈی حکام کا کہنا ہے کہ لینڈ سلائیڈنگ کی وجہ سے شاہراہ استور 2 مقامات پر بلاک ہو گئی ہے ،بارش رک جانے کی صورت میں متاثرہ روڈ پر کام شروع کیا جائے گا اور ایک دو روز تک روڈ ہر قسم کی ٹریفک کے لئے بحال کر دی جائے گی ۔واضح رہے کہ اس وقت ضلع استور کے بالائی علاقے پرشینگ ،گدئی ،داس خرم ،دیوسائی ،رٹو ،میر ملک ،قمری اورمنی مرگ میں تقریباً3 فٹ سے زیادہ برف پڑ چکی ہے ، اس وقت ضلع استور کا درجہ حرارت منفی11 ڈگری سینٹی گریڈ تک گر گیا ہے ۔محکمہ موسمیات کی رپورٹ کے مطابق گلگت بلتستان کے تمام علاقوں میں مذید دو2 روز تک بارش اور برفباری ہونے کا امکان ہے ۔