نواز شریف کی زبان بندی پاکستان کیلئے ایک المیہ سے کم نہیں،جمال عارف سہروردی

حیدرآباد(اُردو پوائنٹ اخبارتازہ ترین - آن لائن۔ 17 اپریل2018ء) پاکستان مسلم لیگ(ن) کی مرکزی کونسل کے رُکن جمال عارف سہروردی نے کہا ہے کہ قائد پاکستان مسلم لیگ(ن) نواز شریف کی زبان بندی کی گئی ہے جوکہ پاکستان کیلئے ایک المیہ سے کم نہیں۔ انہوں نے کہاکہ پاکستان کی خالق جماعت مسلم لیگ کے قائد نواز شریف کو وزارت سے نکالا گیا ، مسلم لیگ کی صدارت کیلئے نااہل قرار دیا گیا اور اب عمر بھر کیلئے نااہل قرار دیدیا گیا یہ فیصلہ پاکستانی عوام نے قبول نہیں کیا ۔

مسلم لیگ (ن) لطیف آباد کے زیر اہتمام رائل کلب میں صحافیوں کے اعزاز میں دیئے جانے والے استقبالیہ سے خطاب کرتے ہوئے جمال عارف سہروردی نے کہاکہ نواز شریف کی جتنی مرضی زبان بندی کرلیں جیت نواز شریف کی ہوگی۔انہوں نے کہاکہ اگر عوامی لیڈر نواز شریف کو مزید دیوار سے لگانے کی کوشش کی گئی تو بڑے پیمانے پر ملک میں انتشار برپا ہوسکتا ہے ۔

(جاری ہے)

نواز شریف محب وطن پاکستانی ہیں ان کا مرنا جینا پاکستان کے ساتھ ہے۔

انہوں نے کہاکہ 21ویں صدی ہے دنیا نئے موڑ پر ہے ہمیں بھی ایک دوسرے کا احترام کرنا ہوگا ،پرانی غلطیاں نہیں دہرانا چاہئیں، انہوں نے کہاکہ نواز شریف نے ایٹمی دھماکے کئے ہوسکتا ہے اس پر بھی ریفرنس داخل ہوجائے۔ انہوں نے کہا کہ ملک میں غیر مہذب پابندیاں نہیں لگائی جاسکتیں، عوام کی زبان بندی نہیں کی جاسکتی، کیونکہ بنیادی حقوق سب کے برابر ہیں۔

انہوں نے کہاکہ آئین، قانون اور ووٹ کو عزت دینے کی بات کرتا ہوگی ، مسلم لیگ (ن) 22 کروڑ عوام کے حقوق کی بات کرتی ہے۔انہوں نے کہا کہ یہ ملک سب کا ہے اور سب کے یکساں حقوق ہیں، احتجاج سب کا حق ہے کسی کی زبان بند نہیں کر سکتے،آج جتنے محب وطن ہیں وہ غدار ہیں۔تقریب سے مسلم لیگ(ن) تعلقہ لطیف آباد کے صدرفرحان یوسف زئی نے خطبہ استقبالیہ دیا۔ اس موقع پر ایچ یو جے کے صدر حمید الرحمن، نائب صدر ناصر شیخ، شاہد شیخ ، مسلم لیگ کے رہنما میر امان اللہ تالپور، قمر زمان راجپر، آصفہ ریاض اور دیگر نے بھی خطاب کیا ۔ جبکہ صوفی عمردراز پاکستانی نے ملک و ملت کی سالمیت اور استحکام کیلئے دعا کی۔