اسلام آباد ہائی کورٹ کا زرعی ترقیاتی بنک کی تزین و آرائش من پسند ٹھیکدار کو دینے کے حوالے سے دائر درخواست پر فریقین کو نوٹس جاری

جمعہ 27 اپریل 2018 19:02

اسلام آباد (اُردو پوائنٹ اخبارتازہ ترین - این این آئی۔ 27 اپریل2018ء) اسلام آباد ہائی کورٹ نے زرعی ترقیاتی بنک کی تزین و آرائش من پسند ٹھیکدار کو دینے کے حوالے سے دائر درخواست پر فریقین کو نوٹس جاری کردیاہے ۔ جمعہ کو عدالت عالیہ کے جسٹس میاں گل حسن اورنگزیب نے زرعی ترقیاتی بینک یونین کے سیکرٹری جنرل اقبال خٹک کی جانب سے دائر درخواست کی سماعت کی ۔

اس موقع پر درخواست گزار اپنے وکیل رانا عابد نذیر کے ساتھ عدالت میں پیش ہوئے ۔

(جاری ہے)

درخواست گزار کے وکیل نے موقف اختیار کیا کہ زرعی ترقیاتی بنک بلڈنگ کی صرف تین فلور کی تزین وآرائش کے لئے ساڑھے سات کروڑ روپے کا ٹھیکہ من پسند افراد کو دیاگیا،بنک کی تعمیر و ترقی کے لئے غیر قانونی ٹینڈر کرایا گیا، ٹینڈر کے اجراء میں پیپرا رولز کو نظرانداز کیا گیا،عدالت میں 6 ستمبر 2015 کے اخباری اشتہار پیش کیا جو کہ پرانے ہیںجبکہ 9 مئی 2017 کو ٹھیکہ دیا گیا۔عدالت نے پلاننگ اینڈ ڈویلپمنٹ ڈویژن کو دو بارہ نوٹس جاری کرتے ہوئے کیس کی سماعت 4 مئی تک ملتوی کر دی۔