فیصل آباد ایگریکلچر یونیورسٹی میں زیرتعلیم ہندو طالبہ لاپتا، ڈاکٹر رمیش کمار وانکوانی کا اظہارِ تشویش، اعلیٰ حکام سے فوری بازیابی کا مطالبہ

اتوار 6 مئی 2018 17:50

اسلام آباد/کراچی (اُردو پوائنٹ اخبارتازہ ترین - این این آئی۔ 06 مئی2018ء) پاکستان ہندوکونسل کے سرپرست اعلیٰ اور ممبر قومی اسمبلی ڈاکٹر رمیش کمار وانکوانی نے فیصل آباد ایگریکلچر یونیورسٹی میں زیر تعلیم ہندو طالبہ بسنتی دیوی کی گمشدگی پر سخت اظہار تشویش کیا ہے، ایک جاری کردہ بیان کے مطابق ڈاکٹر رمیش کمار نے کہا کہ بسنتی دیوی دختر کرشن رام یونیورسٹی آف ایگریکلچر فیصل آباد میں ایم ایس سی (شعبہ زولوجی)میں زیرتعلیم تھی جو مورخہ 29اپریل سے لاپتا ہے۔

(جاری ہے)

انہوں نے اعلیٰ حکام سے ہندو طالبہ کی فوری بازیابی کا مطالبہ کرتے ہوئے کہا کہ ایسے واقعات ملک بھر کی محب وطن اقلیتوں میں احساسِ عدم تحفظ میں اضافے کا باعث بن رہے ہیں، ڈاکٹر رمیش نے کہا کہ ایسے واقعات کا رونماء ہونا پورے ملک و قوم کیلئے باعث ِ شرمندگی ہونا چاہیے، انہوں نے صوبائی حکومت سے مطالبہ کیا کہ وہ بسنتی دیوی کی بازیابی یقینی بنانے کیلئے ٹھوس اقدامات اٹھائیں اور ذمہ داران کے خلاف قانون کو حرکت میں لائیں۔