ایران کو ایٹمی ہتھیار حاصل کرنے نہیں دیں گے، امریکی سیکریٹری دفاع

ٹرمپ انتظامیہ اپنے شہریوں کی حفاظت، مفادات اور بہبود کے لیے پرعزم ہے،سینیٹ پینل سے خطاب

جمعرات 10 مئی 2018 12:23

واشنگٹن(اُردو پوائنٹ اخبارتازہ ترین - این این آئی۔ 10 مئی2018ء) امریکا کے سیکریٹری دفاع جیمز میٹس نے کہاہے کہ امریکا، ایران کو جوہری ہتھیار حاصل کرنے سے روکنے کے لیے اپنے اتحادیوں کے ساتھ مل کر کام کرتا رہے گا۔

(جاری ہے)

میڈیارپورٹس کے مطابق جیمز میٹس نے سینیٹ پینل کو بتایا کہ ہم اس بات کو یقینی بنانے کے لیے اپنے اتحادیوں اور پارٹنرز کے ساتھ کام کرتے رہیں گے کہ ایران کبھی جوہری ہتھیار حاصل نہ کر سکے، جبکہ ایران کے بدنیتی پر مبنی اثر و رسوخ سے نبرد آزما ہونے کے لیے بھی دوسرے ممالک کے ساتھ کام کریں گے۔

انہوں نے کہا کہ امریکا کی موجودہ انتظامیہ اپنے شہریوں کی حفاظت، مفادات اور بہبود کے لیے پرعزم ہے۔امریکی سیکریٹری دفاع نے کہا کہ ہم نے خطے میں اب تک ایران کو اس کی نقصان دہ اور مہلک سرگرمیوں سے پیچھے ہٹتے نہیں دیکھا۔ان کا کہنا تھا کہ اسی وجہ سے ہم نے مشترکہ جامع پلان آف ایکشن سے نکلنے کا فیصلہ کیا، کیونکہ ہمیں لگا کہ یہ دیرپا کوششوں کے لیے ناکافی ہے۔