ویمن کرکٹ، جنوبی افریقہ نے بنگلہ دیش کو آخری ون ڈے میں ہرا کر سیریز میں 5-0 سے وائٹ واش کر دیا، لارا وولوارت میچ اور لیزل لی سیریز کی بہترین کھلاڑی قرار

منگل 15 مئی 2018 14:50

بلوم فونٹین ۔ (اُردو پوائنٹ اخبارتازہ ترین - اے پی پی۔ 15 مئی2018ء) جنوبی افریقہ ویمن ٹیم نے بنگلہ دیش ویمن ٹیم کو پانچویں اور آخری ایک روزہ میچ میں 6 وکٹوں سے شکست دے کر سیریز میں 5-0 سے وائٹ واش کر دیا، فاتح ٹیم نے 167 رنز کا ہدف 35 اوورز میں 4 وکٹوں پر پورا کیا، لارا وولوارت نے 70 رنز کی ناقابل شکست اننگز کھیل کر ٹیم کو فتح دلائی، لارا میچ اور لیزل لی سیریز کی بہترین کھلاڑی قرار پائیں۔

(جاری ہے)

بلوم فونٹین میں کھیلے گئے پانچویں اور آخری ایک روزہ میچ میں بنگلہ دیش ویمن نے پہلے کھیلتے ہوئے مقررہ اوورز میں 9 وکٹوں کے نقصان پر 166 رنز بنائے، کپتان رومنہ احمد 74 اور شمیمہ خاتون 53 رنز بنا کر نمایاں رہیں، شبنم اسماعیل نے 3 اور مریزن کیپ نے 2 وکٹیں لیں، جواب میں جنوبی افریقہ ویمن نے مطلوبہ ہدف 35 اوورز میں 4 وکٹوں پر حاصل کیا، لارا وولوارت نے عمدہ بلے بازی کا مظاہرہ کرتے ہوئے 70 رنز کی ناقابل شکست اننگز کھیل کر ٹیم کو کامیابی دلائی۔