پشاور، ایکو ٹورازم کے فروغ کیلئے تجویز کردہ ورثہ میوزیم کا منصوبہ اب حقیقت میں تبدیل ہوگیا

بدھ 23 مئی 2018 23:38

پشاور(اُردو پوائنٹ اخبارتازہ ترین - آئی این پی۔ 23 مئی2018ء) ایکو ٹورازم کے فروغ کیلئے تجویز ورثہ میوزیم کا منصوبہ اب حقیقت میں تبدیل ہوگیا، اپرچترال کے علاقے وادی لاسپورمیں ہری چن کے مقام پر یہ ایک ایسا میوزیم قائم کیا گیا ہے جس میں گیارہویں صدی عیسوی کی اشیاء کو نمائش کیلئے رکھا گیا ہے ، یہ میوزیم شندور روڈ کی جانب واقع ہے ،گلگت بلتستان سے شندور پاس کی جانب آتے ہوئے بھی اس میوزیم کی جانب باآسانی پہنچا جا سکتا ہے ،محکمہ سیاحت خیبر پختونخوا پائیدار ٹورازم فائونڈیشن ،اے کے آر ایس پی کی کاوشوں کو سراہتی ہے جن کی سوچ اور محنت رنگ لائی اور لاسپور وادی کے ہری چن علاقے میں ورثہ میوزیم قائم کیا گیا ہے ۔

تفصیلات کے مطابق میوزیم میں گیارویں صدی عیسوی میں جنگ میں استعمال ہونے والے ہتھیار، گھروں کی اشیاء، روایتی لباس، لکڑی کی بنی اشیاء، موسیقی کے آلات اور دیگر اشیاء کو رکھا گیا ہے ، پولو اس علاقے کا قدیمی اور تاریخی کھیل ہے جس کی تاریخ صدیوں پرانی ہے اس میوزیم میں قدیم دور کی پولو میں استعمال ہونے والے اشیاء بھی سجائی گئی ہیں ۔

(جاری ہے)

اس کے علاوہ یہاں آنے والے سیاحوں کیلئے اپنی نوعیت کے انفرادی میوزیم کی سیر کے علاوہ ان کی رہائش کیلئے مقامی آبادی کے ساتھ مل کر کیمپنگ سائیڈ بھی تعمیر کی جارہی ہے جس میں 30 افراد کی رہائش کی سہولت میسر ہوگی اور وہ یہاں کے ایکو ٹورازم ماحول سے لطف اندوز ہوسکے ہیں، اس کے علاوہ لاسپورکی مقامی آبادی سے آٹھ ایسے نوجوان بھی تیار کئے جائینگے جو کہ اس علاقے کارخ کرنے والے سیاحوں کیلئے بطور ٹریول گائیڈ اپنی خدمات پیش کرینگے ، اس کے ساتھ ساتھ وادی لاسپور میں چند تاریخی ثقافتی گھروں کی تزہین و آرائش بھی کی جائے گی اور ساتھ میں مقامی آبادی پر مشتمل گیسٹ ہائوسز اور یہاں کی مقامی آبادی کی جانب سے تیار کردہ ثقافتی اشیاء کو فروغ دیا جائے گا جبکہ اس کے علاوہ مزید نئے اقدامات اگلے مرحلے میں اٹھائے جائینگے ، ٹورازم کارپوریشن کی بھی یہی کاوش ہے کہ صوبہ میں نئے سیاحتی مقامات کو آباد کیا جائے اور اس کے علاوہ مقامی آبادی کو سیاحتی مقامات کی آباد کاری سے مکمل فائدہ پہنچایا جائے تاکہ وہ اس فائدے سے مکمل مستفید ہوسکیں۔