ریلوے اسٹیشنوں اور ٹریکس کو بم سے اڑانے کی دھمکیوں کے بعد پڈعیدن سمیت مختلف ریلوے اسٹیشن پر سیکورٹی ہائی الرٹ

بدھ 30 مئی 2018 22:20

نوشہروفیروز (اُردو پوائنٹ اخبارتازہ ترین - این این آئی۔ 30 مئی2018ء) ریلوے اسٹیشنوں اور ریلوے ٹریکس پر بم دھماکوں کی دھمکیاں ملنے اور گزشتہ روز حیدرآباد ریلوے ودیگر ریلوے مقامات پر بم دھماکوں کے بعد SSP نوشہروفیروز عمران قریشی اور SP ریلوے سکھر ڈویژن کے حکم پر پڈعیدن اور ارد گرد کے ریلوے اسٹیشنوں ، ریلوے پھاٹک اور ریلوے ٹریکس پر ہائی الرٹ کرتے ہوئے پولیس کے گشت کو بڑھا دیا گیا ہے اور ضلعی وریلوے پولیس نے مشترکہ گشت شروع کردیا ہے۔

(جاری ہے)

ضلع پولیس پڈعیدن کے SHO رانا جمشید راجپوت اور ریلوے پولیس پڈعیدن کے SHO ملک الطاف حسین نے بتایا کہ تھریٹ دھمکیوں کے بعد ریلوے اسٹیشن اور ریلوے ٹریکس اور ٹرینو کی حفاظت کیلئے پولیس 24 گھنٹے ہائی الرٹ ہے ۔ ڈسٹرکٹ پولیس اور ریلوے پولیس نے مشترکہ طور پر ریلوے اسٹیشن پر سنیپ چیکنگ کا سلسلہ شروع کردیا ہے۔اپ اور ڈائون ریلوے ٹریک اور ریلوے اسٹیشن پر سرچ آپریشن اور پیٹرولنگ کی جارہی ہے۔ریلوے اسٹیشنوں اور ریلوے ٹریک پر کڑی نظر نگرانی کرتے ہوئے ریلوے ٹرالی پر نفری کے ہمراہ گشت اور پیٹرولنگ کی جا رہی ہے۔ ڈسٹرکٹ پولیس اور ریلوے پولیس کی مشترکہ کارروائی،پیٹرولنگ کسی بھی ناخوشگوار واقع سے نمٹنے کے لیے کی جا رہی ہے اور ریلوے کالونیوں میں سرچ آپریشن کیا جارہا ہے ۔