شہری تعطیلات کے دوران 2 ماہ کی فیس لینے والے نجی تعلیمی اداروں کے خلاف شکایات درج کرائیں،چیف کمشنر آفتاب اکبر درانی

جمعرات 7 جون 2018 22:21

اسلام آباد ۔ (اُردو پوائنٹ اخبارتازہ ترین - اے پی پی۔ 07 جون2018ء) چیف کمشنر اسلام آباد آفتاب اکبر درانی نے شہریوں سے کہا ہے کہ وہ تعطیلات کے دوران 2 ماہ کی فیس لینے والے نجی تعلیمی اداروں کے خلاف شکایات درج کرائیں، خلاف ورزی کرنے والوں کے خلاف قانون کے مطابق کارروائی کی جائے گی۔

(جاری ہے)

چیف کمشنر نے جمعرات کو جاری عوام الناس کے آگاہی نوٹس میں شہریوں کو ہدایت کی ہے کہ وہ ایرا کے 4جون 2018ء کے نوٹیفکیشن کی خلاف ورزی کرنے والے مختلف سکولوں کے خلاف اپنی شکایات درج کرائیں۔

ایرا کا یہ نوٹیفکیشن اسلام آباد ہائی کورٹ کی ہدایت پر جاری کیا گیا ہے لہٰذ عوام الناس سے درخواست ہے کہ موسم گرما کی تعطیلات کے دوران دو ماہ کی فیس وصول کرنے والے سکولوں کے خلاف ضابطے کے تحت اپنی شکایات درج کرائیں۔ شہری اپنی تحریری درخواستیں ڈپٹی کمشنر آفس کو باضابطہ ارسال کرسکتے ہیں۔ ڈپٹی کمشنر اس ضمن میں متعلقہ سکول کے خلاف کارروائی عمل میں لاتے ہوئے ایرا اور متعلقہ درخواست دہندہ کو آگاہ کرے گا۔