زنانہ ہسپتال کو ضلعی ہیڈکوارٹر ہسپتال منتقل کرنا غریب عوام کیساتھ ناانصافی ہے، عبدالباقی ترین

ہرنائی (اُردو پوائنٹ اخبارتازہ ترین - این این آئی۔ 11 ستمبر2018ء) عوامی نیشنل پارٹی کے ضلعی جنرل سیکرٹری عبدالباقی ترین نے کہاکہ زنانہ ہسپتال ہرنائی کے لیڈی ڈاکٹر ز کو ضلعی ہیڈکوارٹر / لیبر ہسپتال منتقل کرنا ہرنائی کے غریب عوام کیساتھ ناانصافی ہے سول ہسپتال ہرنائی شہر کے قریب ہے جوکہ سپین تنگی کلی خدرانی ، کلی اسپانی ، کلی شور ، بستی شیخان ، اور دیگر کئی دیہات کے لوگوں کیلئے ایک سہولت ہے اب انتظامیہ اپنی سہولت کیلئے سول ہسپتال زنانہ کو مکمل طورپر لیبر ہسپتال منتقل کرنا چاہتی ہے جس سے ہرنائی شہر اور دو یونین کونسل کے لوگوں کو شدید مشکلات کا سامنا ہوگا انہوں نے مزید کہاکہ کچھ عرصہ قبل عوامی نیشنل پارٹی کی کوششوں سے سول ہسپتال میں زچہ بچہ سنٹر قائم ہوا لیکن سنٹر میں تعینات لیڈی ڈاکٹرز ہسپتال کے بجائے اپنی پرائیویٹ کلنک میں ڈلیوری کیسز کرکے غریب عوام کو لوٹ رہے ہیں انہوں نے اپیل کی ہے کہ زنانہ / سول ہسپتال کے لیڈی ڈاکٹرز کو ڈیوٹی کا پابند کرکے ادویات فراہم کیا جائے ہرنائی سول ہسپتال کے زچہ بچہ سنٹر کو 24 گھنٹے عوام کی سہولت کیلئے فعال کیا جائے ۔