قومی سکوائش کے جونیئر کھلاڑی مصر میں 6 ہفتے تک تربیت حاصل کریں گے

بدھ 24 اپریل 2019 12:00

اسلام آباد (اُردو پوائنٹ اخبارتازہ ترین - اے پی پی۔ 24 اپریل2019ء) قومی سکوائش کے جونیئر کھلاڑی مصر میں جدید اور اعلیٰ معیار کی تیاریوں میں مصروف ہیں جو 6 ہفتے تک وہاں تربیت حاصل کریں گے۔

(جاری ہے)

پاکستان سکواش فیڈریشن کے گیم ڈویلپمنٹ آفیسر سکواڈرن لیڈر عامر اقبال نے بتایا کہ فیڈریشن نے جس طرح اسلام آباد نیشنل سکواش اکیڈمی اسلام آباد میں مختلف بین الاقوامی مقابلوں کی تیاری کیلئے کھلاڑیوں کو تربیت فراہم کی ہے اس ضمن میں فیڈریشن نے 6 جونیئر کھلاڑیوں کو جدید اور اعلیٰ معیار کی تربیت کیلئے مصر بھجوایا ہے جن کھلاڑیوں کو تربیت کیلئے بھجوایا گیا ہے ان میں صبور خان، حمزہ خان، نور زمان، فرحان ہاشمی، حمزہ شریف اور حارث قاسم شامل ہے۔

انہوں نے کہا کہ آصف خا ن بطور کوچ کھلاڑیوں کے ہمراہ ہیں۔ قومی کھلاڑیوں کو مصری کوچ اسلام ہنی تربیت دے رہے ہیں۔ توقع ہے کہ اس تربیت سے قومی کھلاڑیوں کی بین الاقوامی سطح پر مہارت میں اضافہ ہوگا اور ان کے کھیل میں مزید بہتری اور نکھار آئے گا انہوں نے توقع کی ہے کہ وہ آنیوالے بین الاقوامی جونیئر ٹورنامنٹس ایشین اور عالمی سطح کے مقابلوں میں اچھے نتائج حاصل کریں گے۔