ڈینگی کے پھیلائو کی وجوہات جاننے کے لیے تحقیقاتی کام کا آغاز

راولپنڈی (اُردو پوائنٹ اخبارتازہ ترین - اے پی پی۔ 28 ستمبر2019ء) ڈینگی کے پھیلائو کی وجوہات ، علاج اور حفاظت بارے مشترکہ تحقیقات کے لییجارجیا یونیورسٹی (یو او جی) اور راولپنڈی میڈیکل یونیورسٹی (آر ایم یو) کے مابین مفاہمت کی یادداشت کا معاہدہ طے پا گیا ،معاہدے کے تحت آر ایم یوبہت جلد ڈینگی بیماری کی ماڈلنگ پر کام شروع کردے گی ۔ وائس چانسلر آر ایم یو ڈاکٹر محمد عمر نے اے پی پی کو بتایا کہ چونکہ انسانوں میں ڈینگی کا انفیکشن سب سے زیادہ تباہ کن مچھروں سے پیدا ہونے والی وائرل بیماریوں میں سے ایک ہے اور یہ بہت سارے ممالک میں ایک اہم مسئلہ بن چکا ہے، اس لئے یو او جی کے اشتراک سے آر ایم یو میں جلد ہی ایک تحقیق پر مبنی مطالعہ شروع کیا جائے گا۔

ڈاکٹر عمر نے بتایا کہ ابھرتی ہوئی متعدی ڈینگی بیماری پر قابو پانے کے لئے آر ایم یو نے گذشتہ سال یو او جی کے ساتھ ایک مفاہمت نامے پر دستخط کیے تھے جس نے ملک میں جڑیں پکڑ لی ہیں۔

(جاری ہے)

وائس چانسلر نے کہا کہ تیزی سے آبادی میں اضافے، آب و ہوا کی تبدیلی، زرعی طریقوں اور ماحولیاتی عوامل ابھرتی ہوئی متعدی بیماریوں کی سب سے بڑی وجہ ہیں۔ انہوں نے کہا کہ حقائق اور اعداد و شمار کے بارے میں درست اعداد و شمار جمع کیے جائیں گے جبکہ ان علاقوں کی نشاندہی کی جائے گی کہ اس کے پھیلاؤ کے لئے کون سے عوامل ذمہ دار ہیں۔

ڈاکٹر عمر نے کہاکہ تحقیقات کی روشنی میں بنیادی طور پر ڈینگی کے تدارک ،اس کی وجوہات ،بچائو کے اقدامات سمیت دیگر امور زیر غور لائے جائیں گے ۔ڈاکٹر عمر نے ڈینگی ماڈلنگ کی وضاحت کرتے ہوئے بتایاکہ ڈینگی ماڈلنگ درحقیقت کسی جانور یا خلیے کو پیش نظر رکھ کر کی جائے گی اور یہ انسداد ڈینگی کے سلسلہ میں آنے والے کئی برسوں کے لیے سود مند تحقیق ثابت ہو گی۔