پنجاب حکومت نے فیسوں میں رعایت کے لیے پرائیویٹ سکول مالکان سے 48 گھنٹوں میں تجاویز طلب کر لیں

اپریل اور مئی کی فیس میں کم از کم 20 فیصد کی رعایت ،کوئی بھی سکول اکٹھے تین ماہ کی فیس وصول نہ کرے‘ وزیر قانون کی زیر صدارت اجلاس

منگل 31 مارچ 2020 17:03

لاہور(اُردو پوائنٹ اخبارتازہ ترین - این این آئی۔ 31 مارچ2020ء) پنجاب حکومت نے فیسوں میں رعایت کے لیے پرائیویٹ سکول مالکان سے 48 گھنٹوں میں تجاویز طلب کر لیں۔صوبائی وزیرقانون راجہ بشارت کی زیر صدارت اس حوالے سے خصوصی کمیٹی کا اجلاس ہوا ۔ اجلاس میں صوبائی وزیر تعلیم ڈاکٹر مراد راس ،پنجاب کے پرائیویٹ سکولزکے مالکان اور سرکاری حکام نے شرکت کی ۔

(جاری ہے)

راجہ بشارت نے کہا کہ مشکل کی اس گھڑی میں مالی طورپرمستحکم طبقہ کمزور اور متاثرہ افراد کے ریلیف میں حصہ ڈالے۔سکول مالکان اپریل اور مئی کی فیس میں کم از کم 20 فیصد کی رعایت دیں،کوئی بھی سکول اکٹھے تین ماہ کی فیس وصول نہ کرے۔ راجہ بشارت نے کہا کہ کسی ٹیچر کو فارغ کیا جائے نہ ہی اس کی تنخواہ میں کٹوتی کی جائے۔ انہوں نے کہا کہ پنجاب حکومت طلباء ، والدین، اساتذہ اور سکول مالکان کے مفادات کومساوی ترجیح دیتی ہے۔ راجہ بشارت نے کہا کہ سکول مالکان کی تجاویزکے بعد وزیر اعلی پنجاب سردار عثمان بزدار حتمی فیصلہ کریں گے۔