متحدہ عرب امارات: ایک ہی دن میں 200 سے زائد افراد کورونا وائرس کو شکست دینے میں کامیاب

مملکت میں پیر کے روز مزید 203 مریض صحتیاب ہوگئے، اب تک 2 ہزار 966 مریض وبا سے چھٹکارا پا چکے، جبکہ کل کیسز 14 ہزار سے زائد

محمد علی منگل 5 مئی 2020 01:03

متحدہ عرب امارات: ایک ہی دن میں 200 سے زائد افراد کورونا وائرس کو شکست ..

ابوظہبی (اُردو پوائنٹ تازہ ترین اخبار۔4مئی2020ء ) متحدہ عرب امارات میں پہلی مرتبہ ایک دن میں 200 سے زائد افراد کرونا وائرس کو شکست دینے میں کامیاب، مملکت میں پیر کے روز مزید 203 مریض صحتیاب ہوگئے، اب تک 2 ہزار 966 مریض وبا سے چھٹکارا پا چکے، جبکہ کل کیسز 14 ہزار سے زائد ۔ دوسری جانب بتایا گیا ہے کہ پیر کے روز متحدہ عرب امارات میں کورونا کے 567نئے کیسز سامنے آگئے اور مزید 11مریض جاں بحق ہوئے۔

یوں مملکت میں کرونا وائرس سے متاثرہ افراد کی تعداد 14ہزار730ہوگئی ہے۔ ملک میں اب تک 137افراد جان کی بازی ہار چکے ہیں جبکہ مجموعی طور پر 2ہزار966مریض صحتیاب ہوکر گھروں کو جاچکے ہیں جس کے بعد ایکٹو کیسز کی تعداد 11ہزار627ہوگئی ہے۔ دوسری جانب 2 روز قبل متحدہ عرب امارات کے سربراہ شیخ خلیفہ بن زاید النہیان، دُبئی کے فرمانروا شیخ محمد بن راشد المکتوم، ابوظبی کے ولی عہد شیخ محمد بن زاید النہیان نے امارات میں مقیم تمام مقامی اور غیر ملکی افراد کو خوش خبری دی کہ اماراتی طبی مرکز میں کورونا وائرس کے کامیاب علاج کا تجربہ کامیاب ہو گیا ہے۔

(جاری ہے)

ابو ظہبی کے سٹَیم سیل سنٹر میں ڈاکٹروں اور ریسرچرز کی ایک ٹیم نے سٹیم سیل کے ذریعے کورونا کا مرض ختم کرنے کا طریقہ دریافت کیا ہے۔ اس طریقہ میں کورونا کے مریض کے ختم سے سٹیل سیلز نکالے جاتے ہیں اور پھر انہیں ایکٹیویٹ کر کے دوبارہ مریض میں منتقل کر دیئے جاتے ہیں، جس سے مریض جلد شفایاب ہو جاتا ہے۔ اس منفرد علاج کا تجربہ 73 مریضوں پر کیا گیا ہے سب کے سب شفا یاب ہوگئے. مریض کے خون سے نکالے گئے سٹیم خلیے ناک کے ذریعے پھیپھڑوں میں پہنچائے گئے.اس طریقہ علاج کی بدولت پھیپھڑے میں نئے خلیے پیدا ہوتے ہیں اور نئے کورونا کے وائرس کو لگنے سے روک دیتے ہیں. علاوہ ازیں مزید صحت مند خلیوں کو نقصان پہنچانے سے بھی بچاتے ہیں۔

امارات کے سربراہ شیخ خلیفہ بن زاید نے امارات کے عوام اور تارکین وطن کی جانب سے ابوظبی سٹیم سیل کے ڈاکٹرز، ریسرچرز اور دیگر عملے کا کورونا کے علاج میں اہم پیش رفت کرنے پر ان کا شکریہ اداکیا ہے۔ ان کا کہنا تھا کہ اس طریقہ علاج سے دُنیا بھرمیں پھیلی کورونا وبا کے خاتمے میں بے پناہ مدد مِلے گی۔