ڈینگی کے خلاف جاری کردہ ایس او پیز پر عمل درآمد یقینی بنایا جائے، ڈپٹی کمشنر راولپنڈی

راولپنڈی (اُردو پوائنٹ اخبارتازہ ترین - اے پی پی۔ 07 مئی2020ء) ڈپٹی کمشنر راولپنڈی کیپٹن(ر) انوار الحق نے کہا ہے کہ ڈینگی کے خلاف جاری کردہ ایس او پیز پر عمل درآمد یقینی بنایا جائے۔ کورونا وائرس اور ڈینگی سمیت دیگر وبائی امراض کے خلاف کوششیں بلا تعطل جاری رکھی جائیں گی۔انہوں نے کہا کہ حکومت پنجاب ڈینگی کے سلسلے میں زیرو ٹالرنس پالیسی پر عمل پیر ا ہے کسی بھی افسریا اہلکار کی کوتاہی ہر گز برداشت نہیں کی جائے گی۔

ڈپٹی کمشنر راولپنڈی کیپٹن(ر) انوار الحق کی زیر صدارت انسداد ڈینگی اجلاس منعقد ہوا ۔اجلاس میں انہوں نے کہا کہ ڈینگی اور کورونا جیسی وبائی امراض کی احتیاطی تدابیر اپنا کر ان موذی مرض سے بچاجاسکتا ہے۔ ڈینگی کو شکست دینے کے لیے عوام کا تعاون ناگریز ہے ۔

(جاری ہے)

ڈپٹی کمشنر انوار الحق نے تمام متعلقہ محکموں کے حکام کو ہدایت کی کہ ڈینگی کے کام پر مامور ٹیموں کی حاضری سو فیصد یقینی بنانے کے ساتھ ساتھ فیلڈ میں ہونے والے کام کی کڑی مانیٹرنگ کریں اور غیر معیاری کام کسی صورت برداشت نہیں کیا جائے گا۔

انہو ںنے کہا کہ ان ڈور اور آئوٹ ڈور سرویلنس میں مزید بہتری لائیں اور گذشتہ سال ڈینگی کی وباء سے متاثرہ یونین کونسلوں کو خصوصی طور پر فوکس کیا جائے اور ان ڈور اور آئوٹ ڈور سرویلنس کے دوران ہر اس پہلو پر کڑی نظر رکھی جائے جو کہ ڈینگی پھیلنے کے موجب بنتے ہیں۔ اجلاس میں بتایا گیا کہ پوٹھوار ٹائون میں ان ڈور اور آئوٹ ڈور سرویلنس کے دوران 65 مقامات، جبکہ کنٹو نمنٹ ایریا سے 29 مقامات اور چکلالہ کینٹ بورڈ سے 39 مقامات سے لاروا برآمد ہوا۔ اس موقع پر ڈپٹی کمشنر نے کہا کہ آئندہ ان مقامات سے لاروا برآمد ہونے کی صورت میں گھر کے مالکان کو نوٹسس جبکہ کمرشل ایریا سے لاروا برآمدہونے کی صورت میں مالکان کے خلاف قانونی کارروائی عمل میں لائی جائے ۔