انسداد دہشتگردی کی خصوصی عدالت نے کالعدم جماعة الدعوة کے تین رہنماؤں کو دو مزید مقدمات میں سزائیں سنا دیں

پروفیسر ظفر اقبال اور محمد اشرف کو مجموعی طور پر 16، 16 سال جبکہ پروفیسر حافظ عبدالرحمن مکی کو ایک سال کی سزا سنائی گئی

جمعرات 5 نومبر 2020 17:18

لاہور(اُردو پوائنٹ اخبارتازہ ترین - این این آئی۔ 05 نومبر2020ء) انسداد دہشتگردی کی خصوصی عدالت نے کالعدم جماعة الدعوة کے تین رہنماؤں کو دو مزید مقدمات میں سزائیں سنا دیں، پروفیسر ظفر اقبال اور محمد اشرف کو مجموعی طور پر 16، 16 سال جبکہ پروفیسر حافظ عبدالرحمن مکی کو ایک سال کی سزا سنائی گئی ۔

(جاری ہے)

گزشتہ روز انسداد دہشٹگردی کی خصوصی عدالت نمبر 3 کے جج اعجاز احمد بٹر کی عدالت میں سی ٹی ڈی کی طرف سے درج مقدمہ نمبر 89/19اور 90/19کی سماعت ہوئی جس میں گواہوں کے بیانات ریکارڈ اور جرح کے بعد مقدمات کا فیصلہ سنایا گیا ہے۔

کالعدم جماعة الدعوة کے رہنماؤں کے خلاف انسداد دہشت گردی کی خصوصی عدالتوں میں مزید کئی مقدمات زیر سماعت ہیں جن میں گواہوں کے بیانات ریکارڈ کئے جا رہے ہیں جبکہ نصیرالدین نیئر اور محمد عمران فضل گل ایڈووکیٹ جرح کر رہے ہیں۔ واضح رہے کہ اس سے قبل بھی کالعدم جماعةالدعوة کے امیر پروفیسر حافظ محمد سعید سمیت حافظ عبدالسلام بن محمد، پروفیسر حافظ عبدالرحمن مکی، پروفیسر ظفر اقبال، یحییٰ مجاہد، لقمان شاہ اور حافظ مسعود الرحمن کو مختلف مقدمات میں سزائیں سنائی جا چکی ہیں۔