پنجاب حکومت نے سپریم کورٹ کے احکامات پر سرکاری افسران کیلئے ڈریس کوڈ جاری کر دیا

ڈپٹی کمشنرلاہور کے عدالت میں غیر رسمی لباس میں پیش ہونے پر سپریم کورٹ کے فاضل جج نے سختی سینوٹس لیاتھا

بدھ 27 جنوری 2021 00:06

لاہور(اُردو پوائنٹ اخبارتازہ ترین - این این آئی۔ 26 جنوری2021ء) پنجاب حکومت نے سپریم کورٹ کے احکامات پر سرکاری افسران کیلئے ڈریس کوڈ جاری کر دیا۔سپریم کورٹ کی جانب سے ڈپٹی کمشنر لاہور مدثر ریاض کی سرزنش کے بعد پنجاب حکومت نے دوران ڈیوٹی اورعدالتوں میں پیشی کے لئے ڈریس کوڈ جاری کر دیا۔ افسروں کو ہدایت کی گئی ہے کہ جب عدالتوں میں پیش ہوں تو آپ کے لباس میں تہذیب جھلکے، فارمل لباس میں جائیں، سوٹ پہنیں، اگر نہیں ہے تو پینٹ شرٹ پہنیں اور قمیض کے تمام بٹن بند کریں، شلوار قمیض پہنیں تو ویس کوٹ بھی پہنیں۔

(جاری ہے)

حکومت پنجاب نے عدالتوں میں پیش ہونے کے لیے افسران کے لئے کلوز کالر شرٹ اور ٹائی ، شلوار قمیض اور ویس کوٹ پینا لازمی قرار دیا ہے۔ افسران کو بند جوتے پہننے کا بھی کہا گیا ہے۔ نوٹیفکیشن میںخواتین افسران کے لئے بھی لباس کے حوالے سے ہدایات جاری کی گئی ہیں۔پیر کے روزسپریم کورٹ لاہوررجسٹری میںکیس کی سماعت کے دوران ڈی سی لاہور مدثر ریاض ملک کے عدالت میں غیر رسمی لباس میں پیش ہونے پر نوٹس لیا گیا تھا اور چیف سیکرٹری کو طلب کر کے حکم دیا گیاتھا کہ افسران کے عدالتوں میں لباس کے حوالے سے احکامات جاری کریں۔