دبئی میں جاری کرونا ایس او پیز میں رمضان تک توسیع کا فیصلہ

ابو ظہبی(اُردو پوائنٹ اخبارتازہ ترین - این این آئی۔ 27 فروری2021ء) متحدہ عرب امارات کے شہر دبئی میں نافذ کرونا وائرس ایس او پیز میں ماہ رمضان تک توسیع کا فیصلہ کیا گیا ہے، توسیع کا فیصلہ ملک میں کرونا وائرس کی تازہ صورتحال کو مدنظر رکھتے ہوئے کیا گیا ہے۔مقامی میڈیا رپورٹ کے مطابق دبئی میں قدرتی آفات اور بحرانوں کی اعلی انتظامیہ نے کرونا وائرس سے بچا کے حفاظتی اقدامات (ایس او پیز) میں رمضان تک توسیع کا فیصلہ کیا ہے۔

اعلی انتظامیہ کا اجلاس شیخ منصور بن محمد بن راشد آل مکتوم کی صدارت میں ہوا تھا، توسیع کا فیصلہ ملک میں کرونا وائرس کی تازہ صورتحال کو مدنظر رکھتے ہوئے کیا گیا ہے۔اجلاس میں دبئی کے تمام متعلقہ اداروں نے سفارشات پیش کی تھیں کہ حفاظتی اقدامات پر رمضان کے آغاز تک عمل درآمد جاری رکھا جائے، نئے فیصلے کے مطابق رمضان کی آمد تک امارات میں حفاظتی اقدامات برقرار رہیں گے۔

(جاری ہے)

سینما گھروں، تفریحی مراکز، اسپورٹس سینٹر، انڈور اسپورٹس کے حوالے سے تعداد 50 فیصد گنجائش سے کم رہے گی، ہوٹلوں، شاپنگ سینٹرز، سوئمنگ پولز اور ہوٹلوں کے ماتحت ساحلوں کو استعمال کرنے والوں کی تعداد جگہ کی گنجائش سے 70 فیصد سے زیادہ پر پابندی رہے گی۔کرونا ایس او پیز پر عمل درآمد کو یقینی بنانے کے لیے سخت تفتیشی مہم جاری رہے گی، اعلی انتظامیہ نے ہدایت کی ہے کہ وبا کی صورتحال کو مدنظر رکھتے ہوئے حفاظتی اقدامات میں لچکدار رویہ اپنایا جانا ضروری ہے۔

حکام کے مطابق کووڈ 19 کی وبا سے نمٹنے کے لیے واضح پروگرام موجود ہے، اس کے نفاذ کی ذمہ داری متعلقہ اداروں میں تقسیم کردی گئی ہے۔اجلاس میں کہا گیا کہ دبئی سمیت متحدہ عرب امارات کی تمام ریاستوں میں کرونا ویکسین کی مہم تیزی سے نافذ کی جارہی ہے اور صورتحال تسلی بخش ہے، آبادی کے حوالے سے دنیا بھر میں سب سے زیادہ کرونا ٹیسٹ امارات میں ہوئے ہیں اور ویکسین کی سب سے زیادہ خوراکیں بھی امارات میں دی گئی ہیں۔