لسبیلہ یونیورسٹی آف ایگریکلچر اینڈ واٹر میرین سائنسز میں پرنٹ و الیکٹرونک میڈیا کے نمائندوں کے داخلے پر پابندی عائد کردی گئی

اوتھل(اُردو پوائنٹ اخبارتازہ ترین - این این آئی۔ 12 اپریل2021ء) اوتھل میں واقع لسبیلہ یونیورسٹی آف ایگریکلچر اینڈ واٹر میرین سائنسز میں پرنٹ اور الیکٹرونک میڈیا کے نمائندوں کے داخلے پر پابندی عائد کردی گئی۔ لسبیلہ یونیورسٹی کے شعبہ ویٹرنری اینیمل سائنسز کے ڈیڑھ سو سے زائد طلباء وطالبات نے کورونا کے پیش نظر پڑھائی متاثر ہونے اور یونیورسٹی کی جانب سے کئی نصاب میں فیل ہونے پر آٹھ روز سے دھرنا جاری رکھا ہوا ہے۔

(جاری ہے)

اس حوالے سے طالبعلموں کا کہنا ہے کہ کورونا کے پیش نظر یونیورسٹی انتظامیہ کی جانب سے پڑھائی کا نصاب مکمل نہ ہونا اور طالبعلموں کو نصاب میں فیل کرنا تعلیم دشمن اقدام ہے جسکے باعث طالبعلموں نے یونیورسٹی انتظامیہ سے سمر سمسٹر یا ایوننگ کلاسز کے آغاز کا مطالبہ کر رکھا ہے جس کے برعکس یونیورسٹی انتظامیہ نے کاروائی کرتے ہوئے پرنٹ اور الیکٹرنک میڈیا کے نمائندوں کے داخلے پر پابندی عائد کردی ہے تاکہ طالبعلموں کی جانب سے جاری احتجاج ودھرنے کی کوریج نہ کی جاسکے۔طلباء اپنے مطالبات کو منظور کرانے کے لئے کلاسز کا بائیکاٹ تو کرچکے ہیں مگر تعلیم کا مزید حرجانہ نہ ہو اسکے لئے طالبعلموں نے ڈیپارٹمنٹ کے باہر ہی دھرنا دے کر تعلیم کو جاری رکھنے کا عزم برقرار رکھا ہوا ہے۔