سال گزر گیا، پولیس ملازمین کے بچوں کو تعلیمی اخراجات کیلئے ملنے والی سالانہ سکالرشپ کی رقم نہ مل سکی

فیصل آباد(اُردو پوائنٹ اخبارتازہ ترین - آن لائن۔ 16 ستمبر2021ء) سال گزر گیا، پولیس ملازمین کے بچوں کو تعلیمی اخراجات کیلئے ملنے والی سالانہ سکالرشپ کی رقم نہ مل سکی جبکہ آئندہ سال کیلئے سکالرشپ کیلئے نئی درخواستیں طلب کرنے پر محکمہ پولیس کے ملازمین میں تشویش کی لہر دوڑ گئی۔

(جاری ہے)

آن لا ئن کے مطا بق پولیس ملازمین کے بچے جو میٹرک پاس کرنے کے بعد اعلیٰ تعلیم کیلئے مختلف کالجز اور یونیورسٹی میں تعلیم حاصل کرتے ہیں ان بچوں کے تعلیمی اخراجات کو پورا کرنے کیلئے پولیس ویلفیئر فنڈز سے ہر سال بطور وظائف رقم دی جاتی ہے جو کہ کروڑوں روپے بنتی ہے اور ہر ضلعی کے سی پی او، ڈی پی اوز کی استطاعت نے بچوں کے مکمل کوائف اور کالجز اور یونیورسٹی کی فیسوں کی رسید جمع کر کے ایڈیشنل آئی جی کو بھجوائی جاتی ہیں اور بعدازاں لاہور آئی جی آفس سے منظوری کے بعد درخواست دینے والے پولیس ملازمین کے بچوں کو وظائف کی رقم بذریعہ چیک بھجوائی جاتی ہے، تاہم گزشتہ برس ضلع فیصل آباد سے سینکڑوں پولیس ملازمین نے بچوں کے تعلیمی اخراجات کیلئے درخواستیں دی تھیں، لیکن ایک سال گزرنے کے باوجود ابھی تک ان کو رقم نہیں ملی اور محکمہ پولیس کی طرف سے آئندہ سال کیلئے درخواستیں وصول کرنے کا آغاز کر دیا گیا ہے جس پر پولیس ملازمین نے گہری تشویش کا اظہار کرتے ہوئے آئی جی پنجاب رائو سردار علی، آر پی او فیصل آباد عمران محمود اور سی پی او ڈاکٹر محمد عابد سے مطالبہ کیا ہے کہ پولیس ویلفیئر فنڈز سے ملنے والے تعلیمی اخراجات کی رقم جلد ازجلد فراہم کی جائے اور اس میں تاخیر کرنے والوں کے خلاف محکمانہ کارروائی عمل میں لگائی جائے۔