این سی اوسی کی حاملہ اور دودھ پلانے والی خواتین کو ویکسین لگوانے کی ہدایت

اسلام آباد (اردوپوائنٹ اخبارتازہ ترین۔ 20 ستمبر2021ء) این سی اوسی نے حاملہ اور دودھ پلانے والی خواتین کو ویکسین لگوانے کی ہدایت کردی، کورونا ویکسین حمل کے کسی بھی مرحلے میں لگائی جاسکتی ہے، کورونا ویکسین سے اولاد پیدا کرنے کی صلاحیت متاثر نہیں ہوتی۔ تفصیلات کے مطابق این سی اوسی کا کہنا ہے کہ کورونا ویکسین حاملہ خواتین کیلئے محفوظ اور مئوثر ہے، کورونا ویکسین حمل کے کسی بھی مرحلے میں لگائی جاسکتی ہے، کورونا ویکسین سے اولاد پیدا کرنے کی صلاحیت متاثر نہیں ہوتی۔

دوسری جانب معاون خصوصی برائے صحت ڈاکٹر فیصل سلطان نے اسلام آباد میں میڈیا سے گفتگو کرتے ہوئے کہا کہ کورونا سے نمٹنے کیلئے مئوثر اقدامات کیئے گئے ہیں، عوام کے تعاون سے کورونا پر قابو پانے میں کامیاب ہوں گے، اسلام آباد کو 100فیصد ویکسی نیٹڈ شہر بنانے کی کوشش ہے، ہر شہری کو کوویڈ سے بچاؤ کا ٹیکہ لگا ہوا ہونا چاہیے۔

(جاری ہے)

کسی شہر کی آبادی اتنی زیادہ ہوتی ہے، جو گھروں سے باہرنہیں نکلتی یا مزدوری کرتے ہیں، وہاں تک موبائل ویکسین سنٹر پہنچایا جائے گا، چاروں لوگوں کی ٹیمیں گھر گھر جاکر ویکسی نیشن کرائیں گے،جب اسلام آباد سو فیصد ویکسی نیٹڈ ہوجائے گا تو بیماری پر قابو پانا آسان ہوجائے گا، اور ماسک کی پابندیوں سے جان چھوٹ جائے گی۔

ویکسین مئوثر ہے، حکومت نے خریدی ہے، یہ ویکسین بیماری سے محفوظ رکھے گی، اگر ایک ڈوز لگوا لی ہے تو ویکسین کی ڈوسری ڈوز کیلئے چارہفتے سے زیادہ تاخیر نہ کریں، چار ہفتے کے فوری بعد ویکسین لگوا ئیں، بچوں کو دودھ پلانے والی اورحاملہ خواتین بھی ویکسی نیشن کراسکتی ہیں، کورونا ویکسی نیشن بہت ضروری ہے جلد ازجلد ویکسی نیشن لگوائیں۔آج کل بارشوں کا موسم ہے اس لیے پانی کھڑا نہ ہونے دیں تاکہ ڈینگی مچھر نہ پھیلنے پائے۔

یاد رہے آج پیر کو یہاں معاون خصوصی برائے صحت ڈاکٹر فیصل سلطان ترلائی ہیلتھ سنٹر نے دورہ کیا اور ہیلتھ سنٹر پر دی جانے والی طبی سہولیات اور کورونا ویکسینیشن کا جائزہ لیا۔ اس موقع پر انہوں نے کہا کہ حکومت صحت کے شعبے بہترین طبی سہولیات کی فراہمی کو یقینی بنارہی ہے ، صحت کے شعبے میں بہتری لانے اور کورونا سے نمٹنے کیلئے موثر اقدامات کیے جارہے ہیں۔ انہوں نے عوام سے گزارش کی کہ ماسک پہنیں اور کورونا ویکسین ضرور لگوائیں۔